BANKA E SHQIPËRISË

DEPARTAMENTI  I BURSES SE TIRANES

RREGULLORE

Nr.2, dt.08.11.1999

E LISTIMIT NË BURSËN E TIRANËS

Kapitulli 1

INTERPRETIMI

Neni 1

Baza Ligjore.

Në mbështetje të  ligjit nr.8080, dt.01.03.1996 "Për letrat me vlerë", neni 20 pika 4, Bordi Mbikëqyrës i Bursës së Tiranës nxjerr "Rregulloren e listimit në Bursën e Tiranës".

Neni 2

Përkufizime e përcaktime

1.  Në këtë rregullore, përveç rasteve kur konteksti parashikon ndryshe -

"Bord", nënkupton Bordin Mbikëqyrës të Bursës së Tiranës të përcaktuar në ligjin nr.8080, dt 01.03.1996, "Për letrat me vlerë", neni 19 (1), dhe neni 20(3) dhe (4);

"Komision", nënkupton Komisionin e Letrave me Vlerë të krijuar në bazë të nenit 3 të këtij ligji;

"Bursë", nënkupton tregun e letrave me vlerë të krijuar nga Bursa e Tiranës;

"Emetues", nënkupton një shoqëri aksionere ose një person tjetër juridik, letrat me vlerë të kapitalit apo letrat me vlerë të borxhit të të cilit janë objekt i një kërkese për listim, apo disa nga letrat e tij me vlerë të kapitalit apo borxhit janë aktualisht të listuara;

"Ligj", nënkupton ligjin "Për letrat me vlerë", nr.8080, dt 01.03.1996;

"Emetues i listuar", në rastin e letrave me vlerë të kapitalit, nënkupton një emetues, letrat me vlerë të kapitalit të të cilit janë aktualisht të listuara, dhe në rastin e letrave me vlerë të borxhit, nënkupton një emetues, letrat me vlerë të kapitalit apo të borxhit të të cilit janë aktualisht të listuara;

"Listim", nënkupton regjistrimin në listën zyrtare të Bursës për të shkëmbyer letrat me vlerë në të;

"Komiteti i listimit", nënkupton Komitetin e listimit që emërohet nga Bordi;

"Deklarata e listimit", nënkupton marrjen e angazhimit nga ana e emetuesit në lidhje me bursën (sipas modelit të treguar në Aneksin bashkëngjitur), që përcakton detyrimet për informim të vazhdueshëm që emetuesi merr përsipër, si kusht për listim në Bursë;

"Kërkues i ri" nënkupton, në rastin e letrave me vlerë të kapitalit, një kërkues për listim asnjë letër me vlerë e kapitalit e të cilit nuk është listuar aktualisht në Bursë; dhe në rastin e letrave me vlerë të borxhit, nënkupton një kërkues për listim asnjë letër me vlerë kapitali apo borxhi e të cilit nuk është listuar aktualisht në Bursë.

"Të drejta", përveç kur konteksti parashikon ndryshe, nënkupton një letër me vlerë që emetohet nga shoqëria aksionere për aksionerët ekzistues, e cila i jep atyre të drejtën të  nënshkruajnë apo të blejnë të parët një ofertë shtesë aksionesh të shoqërisë aksionere para se ajo t'i ofrohet publikut;

"Kontratë mundësie", nënkupton nje letër me vlerë, e cila i jep blerësit të saj të drejtën të zotërojë apo të vërë në përdorim cdo letër tjetër me vlerë;

"Garanci" , nënkupton nje letër me vlerë, e cila i jep mbajtësit të saj të drejtën, të paraqitur nga garantuesit apo të tjerë, për të nënshkruar aksionet apo letrat me vlerë të borxhit.

2. Sipas kontekstit, fjalët në numrin njëjës përfshijnë dhe ato në numrin shumës dhe anasjelltas dhe fjalët në gjininë mashkullore përfshijnë dhe ato në gjininë femërore e asnjanëse dhe anasjelltas.

3. Këto rregulla bëhen të detyrueshme për zbatim nga Bursa. Vendimi i Bursës është i formës së prerë dhe i detyrueshëm për emetuesin. Bursa mundet që, herë pas here të nxjerrë njoftime praktike dhe udhëzuese, që janë subjekt aprovimi nga Komisioni, me qëllim të asistimit të emetuesve dhe të këshilltarëve të tyre në interpretimin dhe përmbushjen e këtyre rregullave.

Kapitulli 2

Të përgjithshme

Neni 3

Hyrje.

1. Funksioni kryesor i Bursës është të sigurojë një treg të paanshëm, të rregullt dhe efikas për tregtimin e letrave me vlerë. Në vijim të kësaj, Bordi harton këtë rregullore të listimit që përcakton kërkesat për listimin e letrave me vlerë në Bursë.

2. Kjo rregullore mund të amendohet herë pas here nga Bordi.

3. Përjashtohen nga zbatimi i kësaj rregulloreje letrat me vlerë të borxhit të emetuara nga Qeveria e Republikës së Shqipërisë.

Neni 4

Komiteti i Listimit

Krijohet Komiteti i Listimit anëtarësia e të cilit përcaktohet nga Bordi. Detyrat dhe përgjegjësitë e këtij Komiteti përcaktohen nga Bordi me udhëzim të veçantë.

Neni 5

Proçedura.

Të gjithë formë-kërkesat për listim që i bëhen Bursës, shqyrtohen nga Komiteti i listimit, i cili shqyrton mundësinë dhe përshtatshmërinë për listim të kërkuesit. Pas këtij shqyrtimi, Komiteti i listimit i rekomandon Bordit nëse kërkuesit duhet t'i pranohet ose t'i revokohet e drejta për listim. Bordi pasi vendos për këtë çështje, informon kërkuesin për sa më sipër.

Neni 6

Parimet e përgjithshme.

Listimi në Bursë konsiston në sigurimin dhe përmbushjen e disa elementeve të tillë si:

(1) emetimi dhe publiciteti për letrat me vlerë kryhet në mënyrë të paanshme, të hapur dhe të rregullt dhe investitorëve të mundshëm u jepet informacion i mjaftueshëm, nëpërmjet të cilit ata kanë mundësi të kryejnë një vlerësim të saktë e siç duhet të kërkuesit dhe të letrave me vlerë për të cilat kërkohet listimi;

(2) investitorët dhe publiku janë plotësisht të informuar nga emetuesit e listuar;

(3) jepet vazhdimisht çdo informacion që pritet të ketë ndikim të rëndësishëm në aktivitetin e tregut dhe çmimet e letrave me vlerë të listuara;

(4) të gjithë zotëruesit e letrave me vlerë të listuara trajtohen me drejtësi dhe barazi;

(5) drejtorët e një emetuesi të listuar veprojnë për interesat e aksionerëve të tij si një e tërë kur publiku përfaqëson një pakicë të aksionerëve; dhe

(6)  të gjitha emetimet e reja të letrave me vlerë të kapitalit nga një emetues i listuar u ofrohen fillimisht aksionerëve ekzistues nëpërmjet të drejtave , me përjashtim të rasteve kur ata kanë rënë dakord ndryshe.

Kapitulli 3

PRANIMI PËR LISTIM

Neni 7

Pranimi.

Emetuesit që kërkojnë të pranohen për listim në Bursë, duhet t'i paraqesin Bursës një kërkesë me shkrim në formën që përcakton Bursa dhe në përputhje me nenin 8.

Neni 8

Kërkesa për listim.

Formë-kërkesa (Aneksi 1) duhet të përmbajë detaje e të dhëna të tilla që janë të nevojshme për t'i mundësuar investitorit të bëjë vlerësim të saktë të aktiviteteve, mjeteve, detyrimeve dhe pozitës financiare të emetuesit në momentin kur bëhet kërkesa si dhe të të drejtave që shoqërojnë këto letra me vlerë.

Gjithashtu, kërkesa duhet:

 (a) të paraqesë emrin e kërkuesit;

(b) të japë hollësira të numrave, klasave dhe prerjeve të letrave me vlerë që janë objekt listimi;

(c) të japë hollësira mbi mënyrën e emetimit të letrave me vlerë;

(d) të përmbajë emrin, adresën dhe shkallën e zotërimit të çdo aksioneri kryesor të emetuesit. Në rast se emetuesi është shoqëri bijë e ndonjë shoqërie tregtare tjetër, kërkesa duhet të përmbajë edhe emrin, adresën dhe shkallën e zotërimit të çdo aksioneri kryesor të kësaj të fundit;

(e) të japë hollësira mbi kualifikimin dhe eksperiencën e drejtorëve dhe drejtorit ekzekutiv të kërkuesit;

(f) të specifikojë qëllimin për të cilin do të përdoren nga emetuesi të ardhurat (nëse ka) nga emetimi apo shitja e letrave me vlerë me të cilat ka të bëjë kërkesa.

Neni 9

Deklatrata e listimit.

1. Emetuesit që kërkojnë për listim në Bursë, duhet të nënshkruajnë një marrëveshje me

Bursën, ku ata zotohen të përmbushin të gjitha detyrimet e vendosura për informim të vazhdueshëm mbi letrat me vlerë, sipas nenit 42 të ligjit.

2. Forma e kërkuar e marrëveshjes përcaktohet në Aneksin 2 bashkëngjitur kësaj rregulloreje.

Neni 10

Përfaqësuesit e autorizuar.

Çdo emetues i listuar duhet të emërojë dy përfaqësues të autorizuar, të cilët do të veprojnë gjatë gjithë kohës si kanal kryesor komunikimi i emetuesit me Bursën. Të paktën njëri nga të dy përfaqësuesit e autorizuar duhet të jetë drejtor i emetuesit.

Kapitulli 4

PEZULLIMI DHE HEQJA NGA LISTIMI

Neni 11

Kompetencat e Bursës.

Bursa, me vendim të Bordit, mund të pezullojë tregtimin ose të heqë nga listimi në çdo kohë cilëndo letër me vlerë, me kërkesë ose jo të emetuesit, kur ajo e gjykon këtë të nevojshme për mbrojtjen e investitorëve ose ruajtjen e një tregu të rregullt. Bursa mund ta bëjë një gjë të tillë, pas konsultimit me Komisionin, kur ajo gjykon se:

 (1) një emetues nuk zbaton rregulloren apo marrëveshjen e listimit;

(2) publiku zotëron një numër të pamjaftueshëm aksionesh të emetuesit (sipas nenit 15, paragrafi I, "niveli i parë", pika 7, "niveli i dytë" pika 7 të kësaj rregulloreje);

(3) emetuesi kryen një numër të pamjaftueshëm operacionesh ose nuk ka mjete të mjaftueshme për të garantuar listimin e vazhdueshëm të letrave me vlerë të tij.

Neni 12

Kërkesa për pezullim nga emetuesi.

Kur një emetues e kërkon vetë pezullimin, kërkesa për pezullim duhet t'i bëhet Bursës nga përfaqësuesi i tij i autorizuar, dhe në çdo rast duhet të jetë e bazuar në arsye të forta. Bordi, me udhëzim të veçantë, përcakton se cilat konsiderohen "arsye të forta".

Neni 13

Heqja e pezullimit.

Pezullimi do të vazhdojë derisa të realizohet përmbushja e kërkesave të nevojshme. Vazhdimi i pezullimit për një periudhë të zgjatur kohe, kur emetuesi nuk ndërmerr veprimet e duhura për t'u rilistuar përsëri, çon në heqjen nga ana e Bursës të së drejtës së listimit.

Kapitulli 5

Kriteret PËR LISTIM

Neni 14

Kushtet paraprake.

Ky kapitull përcakton kriteret bazë që duhen përmbushur paraprakisht për listimin e letrave me

vlerë të kapitalit dhe atyre të borxhit, në të dy nivelet përkatëse te listimit. Këto kritere zbatohen si për kërkuesit e rinj ashtu dhe për emetuesit e listuar, përveç rasteve kur vendoset ndryshe.

Duhet theksuar se –

 (1) këto kritere nuk janë përfundimtare, pasi në raste të veçanta Bursa, me vendim të Bordit, mund të vendosë kritere  shtesë;

 (2) varet tërësisht nga gjykimi i Bursës të pranojë apo refuzojë kërkesat për listim dhe se vetëm përputhshmëria me kriteret respektive mund t'i sigurojë kërkuesit të drejtën për listim.

Neni 15

Kriteret për listim.

I. Letrat me vlerë të kapitalit.

Niveli i parë.

Emetuesi që kërkon të listohet në nivelin e parë të listimit duhet të plotësojë këto kritere:

1. Emetuesi duhet të jetë i regjistruar si shoqëri anonime me ofertë publike sipas ligjit "Për shoqëritë tregtare", nr.7638, datë 19.11.1992 dhe duhet të vazhdojë të jetë i regjistruar si i tillë për të qëndruar i listuar. Nëse emetuesi nuk është i themeluar në Shqipëri, por në një vend të huaj, ai duhet të jetë i listuar në një bursë në vendin e themelimit.

2. Të jetë i regjistruar në Qendrën e Regjistrimit të Aksioneve (QRA) sipas ligjit nr.8108 datë 28.03.1996.

3. Kërkuesi i ri duhet të paraqesë llogaritë e tij, të kontrolluara nga një ekspert kontabël i pavarur i njohur, për tre vitet e fundit financiarë përpara kërkesës për listim. Në raste të veçanta, Bursa, me vendim të bordit, mund të pranojë edhe për periudha më të shkurtra.

4. Duhet të ekzistojë një treg i mjaftueshëm për tregtimin e letrave me vlerë për të cilat kërkohet listimi. Kjo nënkupton se Bursa duhet të bindet se do të ketë një interes të mjaftueshëm nga publiku për biznesin e emetuesit dhe letrat me vlerë për të cilat kërkohet listimi.

5. Duhet të ekzistojë një treg i hapur për letrat me vlerë për të cilat kërkohet listimi. Kjo do të thotë se –

a. përqindja minimale e letrave me vlerë në zotërim të publikut, d.m.th personave që nuk janë drejtues, drejtorë ekzekutivë ose aksionerë kryesorë të shoqërisë tregtare apo një ortak i ndonjërit prej tyre, duhet të jetë të paktën 20%, me një numër minimal prej 100 aksionerësh; ose

b. vlera e tregut e emetuesit ose fondeve të aksionerëve nuk duhet të jetë më pak se 50 milionë lekë.

6. Bursa, me vendim të Bordit, mund të ulë kriterin e pikës 5(a), që të paktën 20% e aksioneve duhet të zotërohen prej publikut, në mënyrë që të lejojë pronësi fillestare të aksioneve nga publiku prej të paktën 15%, por me kusht që emetuesi të angazhohet ta rrisë këtë pronësi në të paktën 20%, jo më vonë se fundi i vitit të tretë të listimit.

7. Emetimet në vijim të letrave me vlerë të një klase aktualisht të listuar, nuk i nënshtrohen kufizimeve të pikës 5.

8. Letrat me vlerë, për të cilat kërkohet listim, duhet të jenë lirisht të transferueshme.

9. Nëse kur bëhet një kërkesë për listim për një klasë letrash me vlerë dhe –

a. asnjë prej letrave me vlerë të kësaj klase nuk është aktualisht e listuar, kërkesa duhet të bëhet për të gjitha letrat me vlerë të asaj klase, të emetuara ose që parashikohen të emetohen; ose

b. disa nga letrat me vlerë të asaj klase janë aktualisht të listuara, kërkesa duhet të bëhet për të gjitha letrat me vlerë të asaj klase që janë emetuar ose që parashikohen të emetohen në vijim.

10. Listimi duhet të kërkohet për të gjitha emetimet në vijim të letrave me vlerë të një klase aktualisht të listuar, përpara emetimit të tyre.

Niveli i dytë.

Emetuesi që kërkon të listohet në nivelin e dytë të listimit duhet të plotësojë këto kritere:

1. Emetuesi duhet të jetë i regjistruar si shoqëri anonime me ofertë publike sipas ligjit "Për shoqëritë tregtare", nr.7638, dt 19.11.1992 dhe duhet të vazhdojë të jetë i regjistruar si i tillë për të qëndruar i listuar. Nëse emetuesi nuk është i themeluar në Shqipëri por, në një vend të huaj, ai duhet të jetë i listuar në një bursë në vendin e themelimit.

2. Të jetë i regjistruar në Qendrën e Regjistrimit të Aksioneve (QRA) sipas ligjit nr.8108 datë 28.03.1996.

3. Kërkuesi i ri duhet të paraqesë llogaritë e tij, të kontrolluara nga një ekspert kontabël i pavarur i njohur, për vitin e fundit financiar përpara kërkesës për listim.

4. Duhet të ekzistojë një treg i mjaftueshëm për tregtimin e letrave me vlerë për të cilat kërkohet listimi. Kjo nënkupton se Bursa duhet të bindet se do të ketë një interes të mjaftueshëm nga publiku për biznesin e emetuesit dhe letrat me vlerë për të cilat kërkohet listimi.

5. Duhet të ekzistojë një treg i hapur për letrat me vlerë për të cilat kërkohet listimi. Kjo do të thotë se –

 (a) përqindja minimale e letrave me vlerë në zotërim të publikut, d.m.th personave që nuk janë drejtues, drejtorë ekzekutivë ose aksionerë kryesorë të shoqërisë tregtare apo një ortak i ndonjërit prej tyre, duhet të jetë të paktën 15%, me një numër minimal prej 100 aksionerësh; ose

(b) vlera më e madhe e tregut e emetuesit ose e fondeve të aksionerëve nuk duhet të jetë më pak se 25 milionë lekë.

6. Bursa, me vendim të Bordit, mund të ulë kriterin e pikës 5(a), që të paktën 15% e aksioneve duhet të zotërohen prej publikut, në mënyrë që të lejojë pronësi fillestare të aksioneve nga publiku prej të paktën 10%, por me kusht që emetuesi të angazhohet ta rrisë këtë pronësi në të paktën 15%, jo më vonë se fundi i vitit të tretë të listimit.

7. Emetimet në vijim të letrave me vlerë të një klase aktualisht të listuar, nuk i nënshtrohen kufizimeve të pikës 5.

8. Letrat me vlerë për të cilat kërkohet listim, duhet të jenë lirisht të transferueshme.

9. Nëse kur bëhet një kërkesë për listim për një klasë letrash me vlerë dhe –

 (a) asnjë prej letrave me vlerë të kësaj klase nuk është aktualisht e listuar, kërkesa duhet të bëhet për të gjitha letrat me vlerë të asaj klase, të emetuara ose që parashikohen të emetohen; ose

(b) disa nga letrat me vlerë të asaj klase janë aktualisht të listuara, kërkesa duhet të bëhet për të gjitha letrat me vlerë të asaj klase që janë emetuar ose që parashikohen të emetohen në vijim;

10. Listimi mund të kërkohet për të gjitha emetimet në vijim të letrave me vlerë të një klase aktualisht të listuar, përpara emetimit të tyre.

II. Letrat me vlerë të borxhit.

1. Emetuesi duhet të jetë i regjistruar si shoqëri anonime me ofertë publike sipas ligjit "Për shoqëritë tregtare", nr.7638, datë 19.11.1992 dhe duhet të vazhdojë të jetë i regjistruar si i tillë për të qëndruar i listuar. Nëse emetuesi nuk është i themeluar në Shqipëri por në një vend të huaj, ai duhet të jetë i listuar në një bursë në vendin e themelimit.

2. Kërkuesi i ri duhet të paraqesë llogaritë e tij të kontrolluara, nga një ekspert kontabël i pavarur i njohur, për tre vitet e fundit financiarë përpara kërkimit për listim. Në raste të veçanta, Bursa, me vendim të Bordit, mund të pranojë edhe për periudha më të shkurtra.

3. Nëse aksionet e emetuesit nuk janë të listuara, emetuesi duhet të ketë aktive te qëndrueshme te trupëzuara neto me një vlerë jo më pak se 50 milionë lekë dhe se shuma nominale e çdo klase letrash me vlerë të borxhit për të cilat kërkohet listimi, duhet të jetë jo më pak se 10% e mjeteve neto të prekshme ose 5 milionë lekë, apo ndonjë shumë tjetër siç mund ta përcaktojë Bursa, me vendim të Bordit, herë pas here. Emetimet e mëtejshme të letrave me vlerë të borxhit që janë të njëjta në të gjitha drejtimet me letrat me vlerë të borxhit të një klase që ështe aktualisht e listuar, nuk i nënshtrohen këtyre kufizimeve.

Në raste të veçanta, kur Bursa është e kënaqur me tregtueshmërinë e tyre, mund të pranohet një shumë nominale më e ulët. Në rastin e kontratave të mundësive, garancive apo të drejtave të ngjashme për të nënshkruar apo blerë letrat me vlerë të borxhit, do të kërkohen të njëjtat kufizime si ato që kërkohen për nënshkrimin apo blerjen e letrave me vlerë të borxhit me të cilat ato lidhen.

4. Letrat me vlerë për të cilat kërkohet listim duhet të jenë plotësisht të negociueshme dhe lirisht të transferueshme.

Neni 16

Hyrja në fuqi

Kjo rregullore hyn në fuqi 15 ditë pas botimit të saj në Buletinin zyrtar të Bankës së Shqipërisë.

KRYETARI

Shkëlqim Cani        Tiranë, më 08/11/1999

Aneksi 1

BANKA E SHQIPERISE

Bursa e Tiranes

KERKESE PER LISTIM

EMRI I SHOQëRISë AKSIONERE______________________________

ADRESA _____________________________________________________

NUMRI I TELEFONIT&FAKSIT_________________________________________

 ("Emri i shoqërisë aksionere") i bën kërkesë Bursës së Tiranës për të listuar dhe tregëtuar kapitalin e saj në të. Në ditën që bëhet kjo kërkesë ("Emri i shoqërisë aksionere") ka _________ aksione të cilat zotërohen nga  __________ aksionerë.

Zyrtarët dhe drejtuesit e ("Emri i shoqërisë aksionere") , së bashku, zotërojnë  __________ aksione. Personat e mëposhtëm sipas regjistrave të ("Emri i shoqërisë aksionere")   zotërojnë më shumë se 5% të aksioneve:

Emri Mbiemri:

______________________  ______________________

______________________  ______________________

______________________  ______________________

______________________  ______________________

______________________  ______________________

Jepni një përshkrim të shkurtër të veprimtarisë së ("Emri i shoqërisë aksionere"), sa kohë ka që zhvillon aktivitet dhe numri i të punësuarve.

________________________________________________________________________________________________________________________________

________________________________________________________________________________________________________________________________

Kërkesës për listim duhet t'i bashkëngjiten dhe dokumentet e mëposhtme, si pjesë integrale e saj:

Deklarata Financiare Vjetore e 3 viteve të fundit dhe raporti i ekspertit kontabël të pavarur të njohur;

Statuti i ("Emri i shoqërisë aksionere") dhe rregulloret e brendshme të saj;

Botimet më të fundit të ("Emri i shoqërisë aksionere")  dhe/ose lajmërime të rëndësishme të saj.

Me pranimin e kësaj kërkese nga Bursa e Tiranës, ("Emri i shoqërisë aksionere") bie dakord se do të:

(1) Njoftojë menjëherë Bursën e Tiranës në rast të:

• ndryshimeve të rëndësishme në karakterin e përgjithshëm apo llojin e veprimtarisë së vet ose në drejtuesit kryesorë të saj;

shitjen, transferimin, këmbimin ose ndryshim tjetër në mjetet apo letrat me vlerë prej saj, prej degëve të saj apo shoqërive tregtare që kontrollon;

çdo mospagim (mosplotësim të detyrimit) të interesit apo kapitalit fillestar, të dividendit kumulativ apo fondeve të amortizimit, të kërkuara nga ("Emri i shoqërisë aksionere") ose nga një shoqëri tregtare kontrolluese e saj (holding).

(2) Të njoftojë menjëherë për çdo ndryshim të rëndësishëm në punët dhe veprimtarinë e ("Emri i shoqërisë aksionere") , qoftë ky i favorshëm ose jo i favorshëm, i cili mund të ndikojë dukshëm në çmimin e letrave me vlerë të ("Emri i shoqërisë aksionere") ose në vendimet për investime.

(3) Të përmbushë të gjitha detyrimet e vëna nga Bursa e Tiranës.(4) Të përcaktojë datën e regjistrimit të dividentit jo më vonë se dhjetë ditë pas datës së

deklarimit.

(5) Të mbajë mbledhje vjetore të aksionerëve për të zgjedhur drejtuesit.

(6) Të botojë dhe t'i dërgojë të paktën njëherë në vit një raport vjetor financiar të gjithë zotëruesve të letrave me vlerë të listuara (dhe të dërgojë kopje në Bursën e Tiranës).

Kjo kërkesë nënshkruhet prej ________________ si  _____________ i ____________________

(Emër Mbiemër)        (Pozicioni)              (Emri i shoqërisë aksionere)

Tiranë, më ___/___/______

(Data)

Aneksi 2

DEKLARATA E LISTIMIT

Ky Formular i Marrëveshjes së Listimit duhet të nënshkruhet nga përfaqësuesi i autorizuar i emetuesit dhe duhet të bashkëshoqërojë formë-kërkesën e tij për t'u pranuar për listim në Bursën e Tiranës.

Për :  Bursën e Tiranës

Nga: " (Emri i shoqërisë aksionere)"

Duke patur parasysh dhënien nga Bursa e Tiranës të formë-kërkesës emetuesit për t'u pranuar për listim në Bursë, dhe për lejimin e tregtimit në letrat me vlerë, të përcaktuara në kërkesën e emetuesit, "("Emri i shoqërisë aksionere")"pranon se tregtimi në letrat me vlerë të emetuesit do të vazhdojë për aq kohë sa do të përcaktohet nga Bursa e Tiranës, dhe ("Emri i shoqërisë aksionere") zotohet dhe bie dakord të përmbushë detyrimet për informim të vazhdueshëm, sipas përcaktimeve të sanksionuara në nenin 41 të ligjit "Për letrat me vlerë", nr. 8080, datë.01.03.1996.

Data___________________

Emri Mbiemri __________________________    Nënshkrimi______________________

Nënshkruar për dhe në emër të emetuesit sipas autorizimit të dhënë me vendim të Bordit të  Drejtorëve më datë____________________.