LIGJ

Nr. 8701, datë 1.12.2000

 

PER LOJERAT E FATIT, KAZINOTE DHE HIPODROMET

 

Në mbështetje të neneve 78 dhe 83 pika 1 të Kushtetutës, me propozimin e Këshillit të Ministrave,

 

KUVENDI I REPUBLIKES SE SHQIPERISE

 

VENDOSI

 

Neni 1

Qëllimi

Ky ligj ka për qëllim të përcaktojë rregullat për mënyrën e zhvillimit të lojërave të fatit, kazinove dhe të basteve, të cilat vihen për garat e zhvilluara në hipodrome, si dhe liçencimin e organizatorit të tyre.

 

Neni 2

Lojërat e fatit. Përkufizimi

1. Lojëra fati quhen ato lojëra, ku pjesëmarrësit paguajnë një shumë të caktuar dhe ku faktori fat ka ndikim të drejtpërdrejtë si në fitimin, ashtu edhe në humbjen e pjesmarrësve në secilën lojë.

2. Nuk quhen lojëra fati :

- Konkurset që zhvillohen në bazë të njohurive të pjesëmarrësve, ku fituesi merr një çmim të caktuar të vendosur për këtë qëllim.

- Pagesat që bëhen nga sigurimi i jetës ose llojet e tjera të sigurimit nëpërmjet tërheqjes me short të biletave të emëtuara për këtë qëllim.

 

Neni 3

Lojërat e fatit. Kategoritë

Për qëllime të këtij ligji, lojërat e fatit klasifikohen në kategoritë e mëposhtëme :

1. Lojërat aritmetike janë ato lojrëra, ku pjesëmarrësi shënon sipas zgjedhjes së vet një seri numrash nga një bashkësi e caktuar numrash të shënuara në biletën e lojës. Lojtari fiton kur numrat e zgjedhur prej tij përkojnë me numrat që do të dalin në hedhjen publike të shortit të kësaj loje. Në këtë kategori hyjnë lojërat e mëposhtëme :

- Loto : Një lojë fati ku organizatori u ofron pjesmarrësve në lojë mundësinë e zgjedhjes së disa numrave nga një grup i caktuar numrash, të cilët janë shënuar në biletën e lojës së hedhur në qarkullim. Fitoret përcaktohen nga përputhja e numrave të zgjedhur nga lojtari me grupin e numrave të dalë nga tërheqja e shortit në mënyrë publike.

- Keno: Një lojë fati gjatë së cilës organizatori i ofron pjesëmarrësve mundësinë e zgjedhjes së disa numrave nga një grup i caktuar numrash të shënuar në një biletë të caktuar. Loja Keno përcaktohet me tri numra a/b/c, ku :

« a » është grupi i numrave të zgjedhur nga lojtari,

« b » është grupi i numrave të dalë nga hedhja e shortit ;

« c » është grupi i të gjithë numrave të biletës.

- Bingo : Loja ku nga hedhja e shortit dalin aq numra sa nevojiten për të pasur një fitues. Në këtë lojë pjesmarrësit pajisen me bileta të caktuara, të cilat përmbajnë një grup numrash, pjesë përbërëse të një grupi tjetër të caktuar numrash.

- Proto: Një lojë fati ku organizatori u ofron pjesëmarrësve në lojë mundësinë të zgjedhin një numër me tre deri në nëntë shifra, i cili ose parashikohet nga pjesëmarrësit ose del rastësisht nga një tërheqje në mënyrë publike e shortit.

- Xhoker: Një lojë fati ku organizatori u ofron pjesëmarrësve në lojë mundësinë të zgjedhin drejtpërdrejt disa numra nga një grup i caktuar numrash, që përfshihen në fushën e parë të biletës dhe një ose më tepër numra, që përfshihen në fushën e dytë të së njëjtës biletë ose në fusha të tjera.

2. Lojëra fati sportive janë ato lojëra fati rezultati i të cilave varet nga parashikimi i saktë nga pjesëmarrësit i rezultatit të një gare ose të një ngjarjeje tjetër sportive. Parashikimi i pjesëmarrësve në to shënohet në një biletë të veçantë, të cilën e shpërndan organizatori i lojës.

Në këtë kategori klasifikohen lojërat e mëposhtëme :

- Konkurs për parashikimet sportive, për gjetjen e rezultateve të ndeshjeve të futbollit ose të lojërave të tjera sportive, ku pjesëmarrësit në lojë duhet të arrijnë të parashikojnë saktë rezultatet e ndeshjeve që janë shënuar në një biletë të veçantë.

- Basti, ku parashikimi për rezultatin e çdo loje, kolektive ose individuale, si dhe të ngjarjeve, natyra e të cilave jep mundësinë e vendosjes së basteve. Rezultatet e të gjitha basteve janë të përcaktuara ose të ndryshueshme. Të përcaktuara janë ato rezultate që vendosen që më parë nga organizatori dhe u njoftohen lojtarëve para fillimit të basteve. Të ndryshueshme janë ato rezultate që ndryshojnë në varësi të shumave që grumbullohen për alternativat e ndryshme të një ose më shumë lojërave ose ngjarjeve, në bazë të të cilave zhvillohen parashikimet dhe përcaktohen përfundimisht pas skadimit të afatit të dorëzimit të biletave për parashikimin përkatës.

Për qëllime të këtij ligji, parashikimi i ndërsjellë për garat me kuaj me rezultatet e parashikuara ose jo sipas nenit 21 të këtij ligji, përjashtohen kategoritë e lojës sportive të fatit dhe ato zhvillohen sipas nenit 23 të këtij ligji.

3. Llotaritë janë ato lojëra fati ku organizatori i ofron blerësit të tyre mundësinë të fitojnë një shumë të caktuar, nëse fiton numri ose kombinimi i numrave ose i simboleve që shënohen në biletën e hedhur në qarkullim nga organizatori.

Llotaritë klasifikohen në :

- Llotari për të cilën hidhet short. Këto janë lojëra fati ku pjesëmarrësi synon të fitojë një shumë të caktuar, nëse në hedhjen e shortit, që bëhet në mënyrë publike, fiton numri që shënohet në biletën që ai ka zgjedhur ;

- Llotaria e çastit. Këto janë lojëra fati ku blerësit të biletës së llotarisë i ofrohet mundësia që ai ta bëjë vetë fshirjen e shiritit mbulues të numrit të shënuar, brenda intervalit kohor të caktuar, në të cilin është e vlefshme seria e biletës së llotarisë.

4. Lojërat elektronike me fitim në çast janë ato lojëra fati të cilat zhvillohen me ndihmën e kompjutërve elektronikë ose të makinave elektronike, që organizatori i ka vendosur në vende të caktuara dhe nëpërmjet tyre pjesëmarrësi në lojë, duke vendosur një shumë, mund të fitojë një shumë të caktuar, të cilën e merr ose drejpërdrejt nga makina ose në një mënyrë tjetër të paracaktuar.

 

Neni 4

Për shqyrtimin e kërkesave për liçensimin dhe mbikqyrjen e lojërave të fatit, në varësi të Ministrit të Financave, krijohet Komiteti i Lojërave të Fatit. Përgjegjësitë, mënyra e organizimit dhe forma juridike që do të ketë ky Komitet përcaktohen me vendim të Këshillit të Ministrave.

 

Neni 5

Emërimi i personelit

Emërimi i personelit, që do të punësohet ne Komitetin e Lojrave të Fatit, bëhet nga Ministri i Financave, i cili miraton edhe numrin e nevojshëm të të punësuarve

 

Neni 6

Leja dhe organizatori

1. Ministri i Financave, me propozimin e Komitetit të Lojrave të Fatit, jep leje për organizimin e lojërave të fatit. Leja jepet për një periudhë kohe 10 -vjeçare.

Për marrjen e lejes për zhvillimin e lojërave të fatit, të parashikuara në këtë ligj, organizatori paguan një shumë prej 10 000 000 (dhjetë milionë) lekësh për njërën nga lojërat e dhëna, si më poshtë :

- Llotaritë aritmetike

- Llotaritë

- Lojërat sportive të fatit

- Lojërat elektronike

Kriteret për dhënien e lejeve për lojërat e fatit përcaktohen me vendim të Këshillit të Ministrave.

2. Organizatori i pajisur me lejen përkatëse, sipas dispozitave të këtij ligji, zhvillon lojërat e fatit në të gjithë territorin e Republikës së Shqipërisë.

3. Leje për ushtrimin e veprimtarive për lojëra fati mund të japin edhe organet e qeverisjes vendore, pas miratimit paraprak nga Ministri i Financave, për personat juridikë, me synimin për të financuar veprimtaritë e tyre bamirëse dhe humanitare. Këto leje jepen vetëm për organizim llotarish dhe duhet të zhvillohen në një vend dhe në kohë të kufizuara dhe të kenë lidhje me një situatë ose ngjarje konkrete. Shpërndarja e të ardhurave për lojërat e parashikuara në këtë paragraf përcaktohet me vendim të Këshillit të Ministrave.

4. Në lejen e dhënë organizatorit duhet të jetë përcaktuar shprehimisht se organizatori është i detyruar të mbulojë vetë shumën e përgjithshme të shpenzimeve që i nevojiten për organizimin, mbikqyrjen dhe funksionimin e lojërave të fatit që ai do të zhvillojë.

5. Standartet e biletave, që përdoren nga organizatori për zhvillimin e lojërave të fatit, propozohen nga Komiteti i Lojërave të Fatit dhe miratohen me akt të Ministrit të Financave.

6. Ministria e Financave merr masa për shtypjen e përqënruar të biletave sipas skemës së duhur, si dhe për shpërndarjen dhe kontrollin e hedhjes së tyre në përdorim.

 

Neni 7

Detyrimet e organizatorit

Leja për organizimin dhe funksionimin e lojërave të fatit i jepet vetëm një shoqërie tregtare, e cila plotëson kushtet e mëposhtëme :

- Eshtë shoqëri anonime, e pajisur me kapital vendas, të huaj ose të përbashkët dhe me seli në territorin e Republikës së Shqipërisë.

- Deklaron themeluesit e shoqërisë.

- Deklaron drejtuesit dhe personelin kryesor të shoqërisë.

- Ka një marrëveshje paraprake për të bashkëpunuar me njërën nga bankat me seli në territorin e Republikës së Shqipërisë për arkëtimin, depozitimin dhe transferimin e pagesave.

- Ka teknologjinë e nevojshme për funksionimin e sitemeve mbështetëse të lojërave të fatit, sipas karakteristikave metrologjike të përcaktuara me ligj.

- Ka personel të përgatirur me specializimin përkatës dhe me përvojën e nevojshme për zhvillimin e lojërave të fatit.

- Garanton pagimin e shumave kundrejt fituesve të lojërave të fatit. Mënyra, forma dhe shuma e garancive përcaktohen në lejen që i jepet organizatorit, në përputhje me dispozitat e këtij ligji.

- Pranon të dorëzojë për kontroll dhe mbikqyrje çdo dokumentacion ose të dhënë që i kërkohet nga Komiteti i Lojërave të Fatit.

 

Neni 8

Revokimi i lejes

Organizatori i lojës së fatit, të cilit i është dhënë leja, në përputhje me kërkesat e këtij ligji, mund t’i hiqet leja nga Ministri i Financave, kryesisht ose me propozimin e Komiteti të Lojërave të Fatit, në rast se ai nuk u përmbahet dispozitave të këtij ligji, si dhe akteve të tjera ligjore, që kanë të bëjnë me zhvillimin e veprimtarisë së tij. Leja i hiqet sidomos në ato raste kur organizatori nuk shlyen rregullisht dhe brenda afateve të përcaktuara detyrimet kundrejt Buxhetit të Shtetit, Komitetit të Lojërave të Fatit, fituesve dhe organeve të kontrollit teknik, si dhe kur nuk bën shpallje zyrtare për përfundimin e hedhjes së shorteve, të cilat duhet të realizohen në prani të komisioneve, ku duhet të marrin pjesë përfaqësues të Komitetit të Lojërave të Fatit.

 

Neni 9

Tatimi për organizatorët

Fitimet, që organizatori i lojërave të fatit realizon nga ushtrimi i veprimtarisë së tij, janë të tatueshme, në bazë të dispozitave ligjore në fuqi.

 

Neni 10

Ndarja e të ardhurave

Tatimpaguesit që ushtrojnë veprimtari në fushën e organizimit të lojërave të fatit i nënshtrohen të gjithë legjislacionit aktual tatimor në fuqi. Përveç kësaj ato paguajnë 20 për qind tatim mbi lojërat e fatit. Ky tatim është pjesë e volumit të qarkullimit gjithsej të realizuar në bazë të arkëtimeve nga shitja e biletave. Këshilli i Ministrave përcakton ndarjen e të ardhurave që mbeten pas zbritjes së TVSH-së dhe të tatimit mbi lojërat e fatit, për organizatorin dhe fituesit.

 

Neni 11

Përsëritja e lejes

1. Ministri i Financave, me propozimin e Komitetit të Lojrave të Fatit, bën ripërtëritjen e lejeve, për afate pesëvjeçare, me të njëjtat kushte. Pagesa për lejet e ripërtërira, sipas këtij paragrafi, janë sa gjysma e shumës së parashikuar në nenin 6 të këtij ligji.

2. Organizatori i lojës së fatit duhet të bëjë kërkesë, pranë Komitetit të Lojërave të Fatit, për ripërtëritjen e lejes, të paktën 6 muaj përpara mbarimit të afatit të lejes së dhënë.

 

Neni 12

Komiteti i Lojërave të Fatit ushtron funksion edhe për shqyrtimin e kërkesave për dhënien e lejeve nga Ministri i Financave dhe nga Ministri i Rendit Publik për ushtrim veprimtarie për kazinotë dhe hipodromet.

 

Neni 13

Kazino

1. Leja për ushtrim veprimtarie për kazino i jepet organizatorit në bazë të dispozitave të këtij ligji për një periudhë 15-vjeçare.

2. Këshilli i Ministrave, me vendim të veçantë, përcakton zonat se ku mund të hapen kazinotë. Ministri i Financave dhe Ministri i Rendit Publik, me propozimin e Komitetit të Lojërave të fatit, përcaktojnë numrin e kazinove, që mund të hapen në çdo zonë të përcaktuar sipas këtij neni. Në çdo rast organizatori i pajisur me leje, nuk mund të hapë më shumë se një kazino në zonat e përcaktuara, sipas këtij neni.

3. Detyrimet e organizatorit dhe kushtet për zhvillimin e veprimtarisë së tij përcaktohen në lejen e dhënë për këtë qëllim.

4. Të gjitha shpenzimet për ngritjen dhe funksionimin e kazinosë janë në ngarkim të organizatorit.

5. Organizatori ka të drejtë që në mjediset e kazinosë të vendosë edhe lojëra elektronike me fitim në çast. Kushtet e vendosjes dhe sasia e tyre përcaktohen në lejen e dhënë. Detyrimi për të ardhurat e realizuara nga këto lojëra është i njëjtë me atë të përcaktuar për organizatorët e tjerë, që kanë si objekt veprimtarie ushtrimin e lojërave elektronike të fatit me fitim në çast.

6. Rregullorja për funksionimin e kazinosë, përsa u përket kushteve që duhen të plotësojnë pjesëmarrësit në lojë, orët e funksionimit të kazinosë, lojërat që do të luhen në të, si dhe organizimi në përgjithësi i kazinosë, miratohen nga Ministri i Financave në çastin e dhënies së lejes.

 

Neni 14

Personeli i kazinosë

1. Personeli i punësuar në kazino duhet të jetë të paktën mbi moshën 21 vjeç, të ketë zotësi të plotë juridike edhe për të vepruar, si dhe nuk duhet të jetë i dënuar më parë penalisht për vepra penale, të cilat parashikojnë dënim me burgim.

2. Organizatori në bashkëpunim me Komitetin e Lojërave të Fatit dhe me Ministrinë e Rendit Publik përcakton mënyrën e sigurimit të kazinosë dhe të kontrollit të pjesëmarrësve në lojë gjatë hyrjes në sallë.

3, Organizatori, vetë ose në bashkëpunim me organet e rendit të vendit ku është hapur kazinoja, merr masat për ndalimin e futjes në mjediset e kazinosë të personave nën moshën 18 vjeç.

4. Organizatori vë në dispozicion të Komitetit të Lojërave të Fatit dhe të personave të autorizuar nga Ministri i Financave dhe organi i kontrollit teknik çdo lloj dokumentacioni ose çdo të dhënë që kërkohet nga këta të fundit, për të ushtruar kontroll ose për mbikqyrjen e veprimtarisë.

 

Neni 15

Organizatori i Kazinove

1. Leja për ushtrim veprimtarie për kazino i jepet një shoqërie tregtare, e cila plotëson kushtet e mëposhtëme :

- Të jetë shoqëri anonime, me kapital vendas, të huaj ose të përbashkët, si dhe të ketë selinë në territorin e Republikës së Shqipërisë.

- Të ketë si objekt të veprimtarisë së saj organizimin e lojërave në kazino.

- Të ketë në organet e saj drejtuese persona të specializuar dhe që zotërojnë njohuri profesionale në fushën e funksionimit të kazinove.

- Kapitali themeltar i shoqërisë të jetë jo më i vogël se sa 30 000 000 (tridhjetë milionë) lekë dhe jo më shumë se 1/10 e tij të jetë në natyrë.

- Të garantojë në çdo çast pagimin e shumave të pjesëmarrësve në lojërat e kazinosë.

- Të deklarojë themeluesit e shoqërisë.

- Të deklarojë drejtuesit dhe personelin kryesor të shoqërisë.

2. Mënyra, forma, kriteret specifike për zgjedhjen e organizatorit, si dhe masa dhe kushtet e garancisë, të parashikuara në pikën 1 paragrafi 5 të këtij neni, përcaktohen me vendim të Këshillit të Ministrave.

 

Neni 16

Revokimi Lejes

Ministri i Financave, kryesisht ose me propozimin e Komitetit të Lojërave të Fatit, mund të revokojë lejen e dhënë për kazino kur vëren shkelje të dispozitave të këtij ligji, të kushteve të përcaktuara në leje, si dhe të akteve të tjera ligjore, që kanë të bëjnë me ushtimin e veprimtarisë së subjektit dhe sidomos, kur nuk shlyen rregullisht dhe brenda afateve të përcaktuara detyrimet kundrejt buxhetit të shtetit, Komitetit të Lojrave të Fatit dhe fituesve.

 

Neni 17

1. Nëse lojërat e fatit, që zhvillohen në kazino, bien në kundërshtim ose cënojnë interesin e përgjithshëm, Ministria e Financave, kryesisht ose me propozimin e Komitetit të Lojërave të Fatit, anulon lejen për zhvillimin e tyre ose ndërpret pa paralajmërim proçedurat për dhënien e lejes.

2. Rastet kur cënohet interesi i përgjithshëm, në kuptim të paragrafit 1 të këtij neni, janë :

- mashtrimi i publikut ;

- pastrimi i parave ;

- cënimi i rendit publik dhe nxitja e kriminalitetit.

 

Neni 18

Organizatorit i jepet leje për zhvillimin e lojërave në kazino, kur ai përveç kushteve të parashikuara në nenin 14 të këtij ligji, plotëson edhe kushtet e mëposhtëme :

- Lojërat të zhvillohen në salla të caktuara paraprakisht për këtë qëllim.

- Përdor pajisje të standarteve të njohura bashkëkohore, sipas karakteristikave teknike të përcaktuara me ligj për të gjitha llojet e lojërave.

- Punëson personel të përshtatshëm që zotëron njohuri profesionale në këtë fushë.

- Ka miratimin e Ministrisë së Rendit Publik për mbrojtjen e mjediseve, brenda dhe jashtë sallës ku do të zhvillohen lojërat.

 

Neni 19

Organizatori i jepet leje për zhvillimim e lojërave në kazino vetëm pasi ai ka paguar shumën prej 30 000 000 (tridhjetë milionë) lekësh për secilën kazino, shumë e cila paguhet vetëm njëherë, me marrjen e lejes.

 

Neni 20

Organizatori i lojës së kazinosë nuk mund të krijojë degë ose filiale të shoqërisë brënda ose jashtë vendit pa miratimin e Ministrit të Financave. Për marrjen e miratimit ai duhet të paraqesë paraprakisht kërkesë pranë Komitetit të Lojrave të Fatit, i cili e shqyrton dhe ia paraqet për miratim Ministrit të Financave.

 

Neni 21

Rregulloret e lojërave në kazino

1. Organizatori përgatit për secilën lojë, që do të luhet në kazino, rregulloren e saj. Ai e bën të njohur këtë rregullore, në mënyrë që pjesëmarrësit në lojëra njihen me të.

2. Rregulloret e lojërave përfshijnë kryesisht :

- Rregullat për mënyrën e pjesmarrjes në lojë dhe përcaktimin e maksimumit dhe të minimumit të shumës, që paguhet për çdo lojë.

- Kushtet për lejimin e hyrjes së personave në kazino.

- Orën e hapjes dhe të mbylljes së kazinosë.

3. Miratimi i rregullore bëhet nga Ministri i Financave me propozimin e Komitetit të Lojërave të Fatit, pas shqyrtimit të projekteve të paraqitura nga organizatori.

 

Neni 22

Ndarja e të ardhurave

Tatimpaguesi, që ushtrojnë veprimtari në fushën e organizimit të lojërave të fatit, i nënshtrohet të gjithë legjislacionit aktual tatimor në fuqi. Përveç kësaj ato paguajnë 20 për qind tatim mbi lojërat e fatit. Ky tatim është pjesë e volumit të qarkullimit gjithsej të realizuar në bazë të arkëtimeve nga shitja e biletave. Këshilli i Ministrave përcakton ndarjen e të ardhurave që mbeten pas zbritjes së TVSH-së dhe të tatimit mbi lojërat e fatit, për organizatorin dhe për fituesit.

 

Neni 23

Hipodromi

1. Organizatorit, i cili kërkon të ushtrojë veprimtarinë në fushën e lojës për garat sportive që zhvillohen në hipodrom, leja i jepet për një periudhë 15-vjeçare nga organet e parashikuara në nenin 11 të këtij ligji.

2. Organizatori, i cili merr lejen për vendosjen e basteve për garat me kuaj ose për garat e tjera në hipodrom, që më poshtë do të quhet « gara », paguan një shumë në favor të shtetit në masën 20 000 000 (njëzet milionë) lekë, e cila paguhet vetëm njëherë, me marrjen e lejes.

3. Organizatorit të pajisur me leje për lojërat e fatit, që zhvillohen për shkak të garave që bëhen në hipodrom, i jepet e drejta për ndërtimin e një stadiumi për garat. Lejet përkatëse për kryerjen e ndërtimit merren nga vetë organizatori, në përputhje me dispozitat ligjore në fuqi. Në rast mosmiratimi të lejes për ndërtimin e hipodromit, brenda një periudhe 1–vjeçare nga data e marrjes së lejes për zhvillimin e lojës, organizatorit i hiqet leja e dhënë për këtë qëllim, si dhe i jepet e drejta për t’iu kthyer shuma e paguar prej tij, sipas paragrafit 2 të këtij neni, vetëm për ato raste kur refuzimi është bërë për shkaqe që nuk varen prej organizatorit.

4. Kushtet specifike të funksionimit të hipodromit, kushtet e pjesmarrjes së lojtarëve, orët e zhvillimit të garave për çdo javë, llojet e basteve që do të vihen, si dhe shumat e basteve për çdo lojë përcaktohen në rregulloren e lojës, e cila miratohet nga Ministria e Financave në çastin e dhënies së lejes.

5. Hyrja në hipodrom lejohet edhe për personat nën 18 vjeç, me kusht që të jenë të shoqëruar nga prindërit ose kujdestarët ligjorë të tyre.

6. Organizatori ka të drejtë që në mjediset e hipodromit të vendosë edhe lojëra elektronike me fitim në çast. Kushtet e vendosjes dhe sasia e tyre përcaktohen në lejen e dhënë. Detyrimi për të ardhurat e realizuara nga këto lojëra është i njëjtë me atë të përcaktuar për organizatorët e tjerë, që kanë si objekt veprimtarie ushtrimin e lojërave elektronike të fatit me fitim në çast. Organizatorit i jepet e drejta së bashku me lejen, të zhvillojë lojëra fati për parashikimet për garat që kryhen në hipodrom, si dhe në pika shitjeje, jashtë hipodromit.

7. Organizatori duhet të informojë pjesëmarrsit në lojë, nëpërmjet transmetimit të drejtpërdrejtë të garave, me mjete elektronike informimi, si dhe t’i bëjë publike rezulatet e garave në po këto mjete, në gazeta me qarkullim në gjithë territorin e Republikës së Shqipërisë, si dhe në pikat e shitjes ose në pika të tjera, që ai mund të ketë ngritur për informimin e pjesëmarrësve në lojë.

 

Neni 24

1. Leja për ushtrimin e veprimtarisë për zhvillimin e basteve për garat në hipodrom i jepet një shoqërie që plotëson kushtet e mëposhtëme.

- Të jetë shoqëri anonime, e pajisur me kapital vendas, të huaj ose të përbashkët, si dhe të ketë selinë në territorin e Republikës së Shqipërisë.

- Të ketë si objekt të veprimtarisë së saj funksionimin dhe mbështetjen e basteve që zhvillohen për garat në hipodrom.

- Të ketë në organet drejtuese të saj persona të specializuar dhe që zotërojnë njohuri profesionale në fushën e zhvillimit të basteve për garat me kuaj.

- Kapitali themeltar i shoqërisë të jetë jo më i vogël se 30 000 000 /tridhjetë milionë) lekë dhe jo më shumë se 1/10 e tij të jetë në natyrë.

- Të garantojë në çdo rast pagimin e shumave të pjesëmarrësve në bastet që ata vënë për zhvillimin e garave në hipodrom.

- Të deklarojë themeluesit e shoqërisë.

- Të deklarojë drejtuesit dhe personelin kryesor të shoqërisë.

2. Mënyra, forma, kriteret për zgjedhjen e organizatorit, si dhe masat e kushtet e garancisë, të parashikuara në paragrafin 1 pika 5 të këtij neni, përcaktohen me vendim të Këshillit të Ministrave.

 

Neni 25

Ndarja e të ardhurave

Tatimpaguesit, që ushtrojnë veprimtari në fushën e organizimit të lojërave të fatit, i nënshtrohen të gjithë legjislacionit aktual tatimor në fuqi. Përveç kësaj, ato paguajnë 20 për qind tatim mbi lojërat e fatit. Ky tatim është pjesë e volumit të qarkullimit gjithsej të realizuar në bazë të arkëtimeve nga shitja e biletave. Këshilli i Ministrave përcakton ndarjen e të ardhurave që mbeten pas zbritjes së TVSH-së dhe të tatimit mbi lojërat e fatit, për organizatorin dhe për fituesit.

 

Neni 26

Revokimi i lejes

Ministri i Financave kryesisht ose me propozimin e Komitetit të Lojërave të Fatit, mund të revokojë lejen e dhënë për kazino kur vëren shkelje të dispozitave të këtij ligji, kushteve të përcaktuara në leje, si dhe të akteve të tjera ligjore, që kanë të bëjnë me ushtrimin e veprimtarisë së subjektit dhe, sidomos, kur nuk shlyen rregullisht dhe brenda afateve të përcaktuara detyrimet kundrejt Buxhetit të Shtetit, Komitetit të Lojërave të Fatit dhe të Fituesve.

 

Neni 27

Sanksionet

1. Ushtrimi i veprimtarive, të cilat janë rregulluar me këtë ligj, pa lejen e organeve përkatëse, dënohet me gjobë si më poshtë :

- për llotaritë aritmetike 40 000 000 lekë

- për llotaritë 40 000 000 lekë

- për lojërat sportive të fatit 40 000 000 lekë

- për makinat elektronike 500 000 lekë (për çdo makinë)

- për kazinotë 40 000 000 lekë

- për bastet 40 000 000 lekë

- për bastet e garave në hipodrom 60 000 000 lekë

2. Shkelja e dispozitave të këtij ligji nga organizatori i lojërave të fatit, kazinove dhe i lojërave të hipodromit, nëse nuk përbën vepër penale, vlerësohet kundravajtje administrative dhe dënohet me gjobë deri në

1000 000 (një milion) lekë.

3. Ankimi për sanksionet e marra kundrejt personave, sipas këtij neni, bëhet në përputhje me dispozitat ligjore në fuqi

 

Neni 28

1. Hedhjet e shortit për secilën lojë bëhen në transmetim të drejtpërdrejtë nga organizatori nëpërmjet mjeteve elektronike të informimit, që mbulojnë të gjithë territorin e Republikës së Shqipërisë, për ato lojëra fati, të parashikuara në këtë ligj, ku personi merr pjesë në lojë me blerjen e biletës dhe kur loja nuk zhvillohet për pjesëmarrës brenda sallave ose për ato lojëra, ku fitimi i jepet në çast.

2. Organizatori informon pjesëmarrësit në lojë për çdo përfundim të lojës dhe shpall fituesit e çdo kategorie nëpërmjet mjeteve të informimit, me mbulim dhe qarkullim në të gjithë territorin e Republikës së Shqipërisë.

3. Shpenzimet për publikimet e bëra, sipas përcaktimit në paragrafët 1 dhe 2 të këtij neni, përballohen nga organizatori.

 

Neni 29

Dispozita përfundimtare

Ngarkohet Këshili i Ministrave për nxjerrjen e akteve në zbatim të neneve 4, 10, 13, 15, 22, 24 e 25 të këtij ligji.

 

Neni 30

Shfuqizuar***

 

Neni 31

Ligji nr. 7871, datë 9.11.1994 « Për lojërat e fatit dhe kazinotë », si dhe çdo dispozitë tjetër, që bie në kundërshtim me dispozitat e këtij ligji, shfuqizohen.

 

Neni 32

Ky ligj hyn në fuqi 15 ditë pas botimit në Fletoren Zyrtare.

 

Shpallur me dekretin nr. 2843, datë 23.12.2000 të Presidentit të Republikës së Shqipërisë, Rexhep Meidani.