Në mbështetje të neneve 78, 83 pika 1, 155 dhe 157 pika 3 të Kushtetutës, me propozimin e Këshillit të Ministrave,

Taksa vendore për biznesin e vogël është një taksë vendore, e klasifikuar si e ardhur e bashkive dhe komunave, sipas kritereve të përcaktuara në ligjin nr.8652, datë 31.7.2000 "Për organizimin dhe funksionimin e qeverisjes vendore".

1. Objekt i taksës vendore për biznesin e vogël është një kuotë fikse vjetore, e pagueshme, e realizuar për çdo vendndodhje ku një person kryen biznes.

2. Subjekt i taksës vendore për biznesin e vogël është çdo person, që kryen biznes në territorin e njësive të qeverisjes vendore të Republikës së Shqipërisë, në çdo periudhë të vitit kalendarik, dhe që nuk i nënshtrohet tatimit mbi vlerën e shtuar, TVSH-së.

Termat e mëposhtëm, në kuptim të këtij ligji, nënkuptojnë:

1. "Organ tatimor" quhet zyra e taksave, e caktuar për ta administruar këtë taksë.

2. "Biznes" është çdo veprimtari ekonomike, që ka për qëllim realizimin e fitimit.

3. "Vendndodhje e biznesit" është çdo dyqan, njësi e veçantë ose vende të tjera të palëvizshme, ku kryhet biznesi. Kur nuk ekziston një vend fiks biznesi, vendndodhja e biznesit, për qëllime të këtij ligji, përcaktohet në përputhje me pikën 7 të nenit 6 të këtij ligji.

4. "Udhëzim" është udhëzimi i përbashkët, i lëshuar nga Ministri i Financave dhe Ministri i Pushtetit Vendor dhe Decentralizimit, në zbatim të këtij ligji.

5. "Person" është çdo person fizik ose juridik, që kryen veprimtari biznesi.

6. "Taksë" është taksa vendore për biznesin e vogël, e vendosur nga ky ligj.

7. "Taksapagues" është çdo person, i cili, sipas këtij ligji, është subjekt i taksës vendore për biznesin e vogël.

8. "Nivel tregues" quhet niveli i taksës vendore për biznesin e vogël, i parashikuar në tabelën 1, që i bashkëlidhet këtij ligji.

Për dy vitet e para nga data e hyrjes në fuqi të këtij ligji, organet tatimore janë degët e tatimeve, me përjashtim të rasteve kur organi tatimor caktohet nga Këshilli i Ministrave, mbështetur në rekomandimin e Ministrit të Financave, në përputhje me kërkesën e organeve të pushtetit vendor.

1. Çdo biznes, në çdo vendndodhje të biznesit, taksohet më vete.

2. Detyrimi i taksës për t'u paguar për çdo biznes, në çdo vendndodhje biznesi, përcaktohet në përputhje me kategorinë e biznesit që kryhet në kohën e regjistrimit dhe riregjistrimit. Kategoritë e biznesit paraqiten në tabelën 1, që i bashkëlidhet këtij ligji.

3. Kur një person kryen më shumë se një veprimtari në të njëjtin vend, niveli tregues i taksës përcaktohet sipas veprimtarisë me qarkullim më të madh.

4. Niveli tregues përcaktohet me kuotë fikse për çdo kategori biznesi, që përcaktohet në tabelën 1, që i bashkëlidhet këtij ligji. Këshilli i bashkisë ose këshilli i komunës në të cilën është vendndodhja e biznesit, mund të rrisë ose të ulë masën e niveleve treguese jo më shumë se 30 për qind. Çdo rritje ose ulje zbatohet në të njëjtën mënyrë për të gjitha kategoritë e biznesit.

5. Bashkia ose komuna njofton organin tatimor për kuotat fikse të taksës që do të zbatohen për vitin kalendarik pasardhës jo më vonë se data 15 dhjetor e vitit në vazhdim. Nëse bashkia ose komuna nuk e bën një gjë të tillë, organi tatimor zbaton automatikisht nivelet treguese, të përcaktuara në tabelën 1, që i bashkëlidhet këtij ligji.

6. Nëse biznesi fillon ose pushon së vepruari gjatë vitit ose ndërpritet përkohësisht, detyrimi i taksës për atë vit llogaritet në bazë të numrit të muajve efektivë të veprimtarisë. Metoda e llogaritjes së taksës, metoda e deklarimit të mbylljes së përkohshme të biznesit, periudha e lejuar për mbylljen e përkohshme dhe mënyra e zvogëlimit të detyrimit për taksën përcaktohen në udhëzim.

7. Udhëzimi përcakton rastet kur, për qëllime të taksimit, një veprimtari ekonomike, në një vendndodhje të biznesit, është e përbërë nga një ose disa biznese.

1. Taksapaguesi do të regjistrojë çdo vendndodhje të biznesit në organin tatimor përgjegjës për atë vendndodhje. Regjistrimi bëhet përpara se taksapaguesi të fillojë biznesin.

2. Gjatë regjistrimit, taksapaguesi detyrohet të japë të dhënat e mëposhtme:

a. vendimin e gjykatës për regjistrimin;

b. çertifikatën personale me fotografi;

c. adresën e vendndodhjes ose vendndodhjeve të biznesit;

ç. llojin e biznesit ose bizneseve që kryhen në atë vendndodhje;

d. numrin e identifikimit të taksapaguesit, lëshuar nga Drejtoria e Përgjithshme e Tatimeve;

dh. numrin e regjistrimit në degën e taksave të pushtetit vendor;

e. çdo të dhënë ose dokument tjetër që kërkohet nga udhëzimi.

3. Taksapaguesi, pas regjistrimit fillestar, riregjistrohet në çdo vit kalendarik që vijon dhe jo më vonë se data 31 mars. Proçedura e riregjistrimit përcaktohet në udhëzim.

4. Kur taksapaguesi nuk regjistrohet ose nuk riregjistrohet në kohën e duhur, ai regjistrohet nga organi tatimor. Ky regjistrim ka të njëjtin efekt me regjistrimin ose riregjistrimin e bërë nga taksapaguesi dhe shoqërohet me sanksione, sipas nenit 12 pika 1.a të këtij ligji.

5. Organi tatimor përgjegjës pajis me çertifikatë regjistrimi çdo taksapagues, i cili ka përfunduar proçesin e regjistrimit në përputhje me udhëzimin. Çertifikata tregon numrin e identifikimit të taksapaguesit, llojin e veprimtarisë dhe adresën e vendndodhjes së biznesit, si dhe numrin e regjistrimit në zyrën e taksave të pushtetit vendor.

6. Kur taksapaguesi kryen një biznes në më shumë se një vendndodhje, ai pajiset me çertifikatë regjistrimi për çdo vendndodhje të biznesit.

7. Nëse taksapaguesi nuk ka një vendndodhje fikse, ku ushtron ndonjërin nga bizneset e tij, atëherë:

a. në rastin e një personi fizik, vendndodhja e ushtrimit të biznesit quhet banesa private e taksapaguesit;

b. në rastin e një personi juridik, vendndodhja e biznesit quhet selia e përcaktuar në vendimin e gjykatës.

1. Taksapaguesi njofton me shkrim organin tatimor përgjegjës për çdo ndryshim në të dhënat e paraqitura, kur është regjistruar ose riregjistruar. Mënyra dhe forma e njoftimit përcaktohen në udhëzim.

2. Taksapaguesi detyrohet të afishojë dukshëm, në vendndodhjen e biznesit, certifikatën e regjistrimit që i është lëshuar nga organi tatimor përgjegjës. Nëse nuk kemi një vendndodhje fikse për veprimtarinë ekonomike, taksapaguesi detyrohet ta paraqesë çertifikatën sa herë që i kërkohet nga punonjësi i organeve tatimore.

1. Udhëzimi përcakton proçedurat e bashkëpunimit ndërmjet organeve tatimore qendrore dhe bashkive ose komunave për administrimin e këtij ligji.

2. Ky bashkëpunim përfshin jo vetëm shkëmbimin e të dhënave ndërmjet organeve qendrore dhe vendore për shumën e mbledhur të taksës, e cila bëhet jo më pak se një herë në 3 muaj, por edhe të dhëna për taksapaguesit, në rastet kur kërkohet të njihet efektiviteti i mbledhjes së taksës.

3. Ky bashkëpunim dhe shkëmbim të dhënash përfshin dhënien në kohë të të dhënave për taksapaguesin dhe për mbledhjen e taksës, që të mundësojë bashkitë dhe komunat në përgatitjen dhe në menaxhimin e buxheteve.

1. Taksa paguhet në dy këste të barabarta. Kësti i parë paguhet në kohën e regjistrimit ose të riregjistrimit. Kësti i dytë paguhet jo më vonë se data 30 shtator, me përjashtim të rasteve kur biznesi ka filluar pas datës 31 mars të atij viti. Në këtë rast kësti i dytë duhet të paguhet jo më vonë se data 31 dhjetor.

2. Nëse taksapaguesi paguan shumën e plotë të detyrimit të taksës në kohën e regjistrimit ose të riregjistrimit, atëherë kjo shumë i zvogëlohet me 10 për qind.

3. Nëse taksapaguesi e përfundon proçesin e riregjistrimit dhe pajiset me çertifikatën e regjistrimit në organet tatimore përpara ditës së fundit të punës për muajin janar të çdo viti të riregjistrimit, ka të drejtën e një zbritjeje prej 2 për qind të shumës së taksës që duhet paguar. Nëse taksapaguesi e përfundon proçesin e riregjistrimit dhe pajiset me çertifikatën e regjistrimit në organet tatimore përpara ditës së fundit të punës për muajin shkurt të çdo viti të riregjistrimit, ka të drejtën e një zbritjeje prej 1 për qind të shumës së taksës që duhet paguar.

4. Nëse organi tatimor përgjegjës zbulon se taksapaguesi, në çastin e regjistrimit ose të riregjistrimit, ka deklaruar të dhëna të pasakta dhe se shuma fikse për t'u paguar është më e madhe se shuma e paguar, ai, sipas rastit, duhet të njoftojë taksapaguesin. Taksapaguesi paguan detyrimin e taksës shtesë brenda 15 ditëve nga marrja e njoftimit.

5. Taksa paguhet në mënyrën dhe vendin e përcaktuar në udhëzim.

6. Kur një biznes mbyllet gjatë vitit dhe vlera e detyrimit për taksën e llogaritur, në përputhje me pikën e 5 të nenit 5 të këtij ligji, është më e vogël se taksa e paguar, diferenca i kthehet taksapaguesit brenda 30 ditëve nga marrja e njoftimit për mbylljen e biznesit.

Taksa e mbledhur në mbështetje të këtij ligji transferohet çdo muaj, brenda datës 10 të muajit pasardhës, në buxhetin e bashkisë ose të komunës ku është vendndodhja e biznesit të taksueshëm.

Taksapaguesi detyrohet të lejojë inspektorët e organit tatimor përgjegjës të hyjnë në mjediset ku ushtrohet biznesi, për qëllime verifikimi të të dhënave të regjistrimit dhe për kontrollin e çertifikatës së regjistrimit.

1. Në kuptim të këtij ligji, kur nuk përbëjnë vepër penale, përbëjnë kundërvajtje administrative:

a. Mosregjistrimi ose mosriregjistrimi i vendndodhjes së veprimtarisë ekonomike, siç përcaktohet në nenin 6 të këtij ligji, ose mospagimi i taksës brenda datës së caktuar dënohen me gjobë, të barazvlefshme me 25 për qind të detyrimit për taksën.

b. Paraqitja e të dhënave të pasakta ose të paplota në çastin e regjistrimit ose të riregjistrimit dënohet me gjobë prej 10.000 lekësh. Kjo gjobë paguhet së bashku me detyrimin e taksës shtesë, sipas pikës 4 të nenit 9 të këtij ligji.

c. Mosafishimi ose mosparaqitja e çertifikatës së regjistrimit, sipas kërkesës së nenit 7 të këtij ligji, dënohet me gjobë prej 10.000 lekësh.

ç. Në rastet kur taksapaguesi nuk lejon inspektorët e organit tatimor përgjegjës të hyjnë në mjediset e biznesit, ai dënohet me gjobë prej 10.000 lekësh.

2. Gjobat paguhen në favor të bashkisë dhe komunës brenda 15 ditëve nga data kur organi tatimor ka nxjerrë vlerësimin.

3. Nëse taksapaguesi nuk paguan taksën ose gjobën, organi tatimor tërheq çertifikatën e regjistrimit dhe mbyll biznesin deri në çastin e kryerjes së pagesës.

1. Taksapaguesi ka të drejtë të ankohet me shkrim ndaj çdo veprimi zyrtar të organit tatimor përgjegjës për shumën dhe mënyrën në të cilën janë vlerësuar detyrimet e tij të taksave, të kërkojë rimbursime, si dhe të apelojë kundër çdo veprimi (ose mosveprimi) tjetër të organit tatimor ose të punonjësve të tij.

2. Çdo apelim paraqitet në organin tatimor përgjegjës brenda 30 ditëve nga marrja e njoftimit për veprimin, që është subjekt apelimi. Forma dhe përmbajtja e apelimit përcaktohen në udhëzim.

3. Organi tatimor përgjegjës nxjerr një vendim brenda 30 ditëve nga data e depozitimit të apelimit. Nëse taksapaguesi nuk është i kënaqur me vendimin e zyrës tatimore, ai mund të apelojë në komisionin e apelimit të tatimeve brenda 30 ditëve nga marrja e njoftimit të vendimit.

4. Komisioni i apelimit të tatimeve nxjerr vendim brenda 30 ditëve nga data e marrjes së apelimit. Nëse taksapaguesi nuk është dakord me vendimin e komisionit të apelimit të tatimeve, ai mund t'i drejtohet gjykatës brenda 30 ditëve nga marrja e njoftimit me shkrim të vendimit.

5. Kur shqyrton një apelim tatimor, subjekti apelues ka të njëjtat të drejta me organin tatimor, i cili ka vlerësuar fillimisht detyrimin e taksës.

6. Taksapaguesi ka të drejtë të paraqitet vetë ose nëpërmjet përfaqësuesve ligjorë të tij në të gjitha apelimet dhe të shpjegojë bazën ku e mbështet apelimin.

7. Një apelim tatimor nuk mund të tërhiqet në rastet kur sillen fakte shtesë, që shuma e detyrimit për taksën e vlerësuar nuk është ajo që duhet.

Ligji nr.8313, datë 26.3.1998 "Për tatimin për biznesin e vogël", me ndryshimet përkatëse, shfuqizohet.

1. Për vitin fiskal 2003, nivelet e taksave për çdo kategori biznesi janë ato të dhëna sipas tabelës 1, që i bashkëlidhet këtij ligji, dhe këshillat e bashkive dhe të komunave nuk e ushtrojnë të drejtën për t'i ndryshuar ato gjatë vitit fiskal 2003, sipas pikës 4 të nenit 5 të këtij ligji.

2. Për të gjitha çështjet për të cilat subjektet apelojnë, proçedurat e apelimit janë sipas ligjit nr.8560, datë 22.12.1999 "Për procedurat tatimore", me ndryshimet përkatëse, për aq kohë sa kjo taksë vazhdon të mblidhet nga administrata qendrore e tatimeve, sipas nenit 4 të këtij ligji.

Ky ligj hyn në fuqi 15 ditë pas botimit në Fletoren Zyrtare.

Nivelet treguese të taksave vendore për biznesin e vogël sipas kategorive (në mijë lekë)

Tabela. Nr.1( si më poshtë)

Klasifikimi:

Në kategorinë I: Bashkia e Tiranës, Bashkia e Durrësit.

Në kategorinë II: Bashkitë: Shkodër, Korçë, Vlorë, Sarandë, Gjirokastër, Elbasan, Fier, Lushnjë, Pogradec, Berat, Lezhë dhe Kavajë.

Në kategorinë III: Të gjitha bashkitë e tjera.

Në komuna niveli tregues i taksës është 50 për qind e nivelit tregues të tij për çdo kategori.