Në mbështetje të nenit 58 dhe pikës 5 të nenit 33 të Ligjit 7928 datë 27.04.1995 "Për TVSH-në", Ministri i Financave

U D H E Z O N :

Operatorët kryesorë të telekomunikacioneve llogarisin dhe paguajnë TVSH-në për vlerën e plotë të kartave telefonike të parapaguara që ata i furnizojnë distributorëve të tyre.

Me vlerë të plotë do të kuptohen çmimi i shpallur ose çmimi përfundimtar i sugjeruar nga operatori kryesor që e emeton atë.

Furnizimi i këtyre kartave në vazhdim nga distributorët do të konsiderohet jashtë objektit të TVSH-së dhe distributorët nuk kanë të drejtë të kreditojnë TVSH-në e faturuar nga operatorët kryesore në lidhje me këto karta.

Ndërkohë, distributorët e kartave telefonike të parapaguara i faturojnë operatorit kryesor vlerën e komisionit që ato përfitojnë për shërbimin që kryejnë. TVSH-ja e llogaritur në këtë rast, është e kreditueshme për operatorin kryesor.

Shembull:

1. Supozojmë që operatori kryesor i telekomunikacionit X hedh në treg karta telefonike me çmim të shpallur 1.000 lekë ( përfshirë TVSH-në).

Kjo shoqëri do të lëshojë një faturë ku TVSH-ja e llogaritur do të jetë:

833,4 + 166,6(TVSH) = 1.000 lekë

2. Shoqëria distributore Y që blen kartën me faturën e mësipërme, nuk llogarit më TVSH në rishitjen e kësaj karte dhe nuk ka të drejtë të kreditojë 166.6 lekë TVSH-në të faturës së lëshuar nga operatori kryesor.

3. Në rast se për shërbimin që i kryen operatorit kryesor X, distributori Y përfiton një komision në masën 15 % të çmimit të shpallur të kartës = 150 lekë, atëherë ai i lëshon një faturë tatimore me TVSH, ku TVSH-ja e llogaritur do të jetë:

150:6 = 25 lekë

pra, 125 + 25 ( TVSH) = 150 lekë

4. Operatori kryesor X ka të drejtë të kreditojë TVSH-në në blerje për shumën 25 lekë.

Për kartat telefonike të furnizuara distributorëve nga operatorët kryesorë para datës së hyrjes në fuqi të këtij udhëzimi, do të vazhdohet të llogaritet e paguhet TVSH-ja nga distributorët deri në shitjen e tyre përfundimtare.

Distributorët janë të detyruar të vazhdojnë të mbajnë regjistrime të mjaftueshme për sasinë e kartave të furnizuara atyre dhe të shitura prej tyre dhe t’ua paraqesin organeve tatimore, kur këto e kërkojnë.