Në mbështetje të nenit 102, pika 4 të Kushtetutës së Republikës së Shqipërisë dhe në zbatim të nenit 74 të Ligjit Nr. 8560, datë 22. 12. 1999 ‘’Për Proçedurat Tatimore në Republikën e Shqipërisë’’, Ministri i Financave,

1.PERFSHIRJA E TATIMPAGUESVE NE VEPRIMTARI EKONOMIKE OSE DISPONIMI I PASURIVE QE KANE ELEMENTE TE TAKSUESHME

1.1 Përgjegjësia për deklarimin dhe regjistrimin e veprimtarisë ekonomike.

Në zbatim të nenit 14 të ligjit, çdo tatimpagues i cili përfshihet në një veprimtari ekonomike, pavarësisht cili është qëllimi dhe rezultati i saj (fitimi apo humbja) është i detyruar të deklarojë në organin tatimor veprimtarinë që realizon ose do të realizojë. Deklarimi i veprimtarisë bëhet në të gjitha rastet kur tatimpaguesi furnizon mallrat apo shërbime, kryen transaksione me pasuri të cilat kanë elementë të taksueshme, luan rolin e ndërmjetësit, të përfaqësuesit tatimor etj. Tatimpaguesi duhet të paraqitet në organin tatimor të juridiksionit, me qëllim që të sqarojë pozicionin e tij lidhur me detyrimet tatimore, të kryejë proçedurat e regjistrimit dhe të pajisjes me dokumentin përkatës.

1.2 Detyrimi i organeve të tjera shtetërore për verifikimin e statusit të tatimpaguesit.

Për identifikimin e veprimtarive ekonomike dhe zbatimin e legjislacionit tatimor mbi këto veprimtari, në zbatim të paragrafit të dytë të nenit 23 të ligjit, organet dhe institucionet e tjera shtetërore dhe joshtetërore janë të detyruara që të japin për organin tatimor informacionet që disponojnë lidhur me veprimtarinë e personave fizikë, personave juridikë dhe individëve( personave natyralë) me të cilët kanë marrëdhenie bashkëpunimi, shërbimi, liçensimi, regjistrimi etj. Këto organe janë të detyruara të kërkojnë nga organi tatimor konfirmimin e statusit të personit me të cilin hyjnë në marrëdhenie juridike apo shërbimi. Nuk mund të hyjnë në marrëdhënie juridike apo shërbimi. Nuk mund të hyjnë në marrëdhënie juridike apo shërbimi me persona, të cilët nuk paraqesin vërtetimin e regjistrimit në degën e tatimeve të juridiksionit përkatës, organet e mëposhtme:

 - Zyrat e regjistrimit të pasurive të paluajtshme, për personat fizikë, personat juridike ose individët (personat fizikë natyralë), që paraqiten në rolin e investitorit në fushën e ndërtimit dhe tregtimit të pasurive të paluajtshme.

 - Zyrat e liçensimit të veprimtarive profesionale apo të aktiviteteve të tjera që kanë nevojë për liçensa specifike.

 - Njësitë dhe zyrat që akordojnë leje si : lejendërtimi, lejeshfrytëzimi dhe të tjera të ngjashme me to.

 - Entet prokuruese, të cilat pranojnë oferta për furnizime mallra apo shërbimesh nga persona të ndryshëm.

 - Njësitë ose zyrat të cilat likujdojnë faturat e furnizimit me mallra apo shërbime nga persona të ndryshëm.

1.3 Zbatimi nga institucionet e tjera shtetërore dhe joshtetërore i vendimeve ekzekutive të organit tatimor

Në zbatim të nenit 33, paragrafi gjashtë, organi tatimor ka të drejtë të nxjerrë vendime të veçanta ekzekutive (urdhër bllokimi, urdhër për moskryerjen e transaksioneve me pasuri të tundshme ose te patundshme të personit etj), të cilat bëjnë të mundur sigurimin e mbledhjes së detyrimeve tatimore ligjore nga persona, të cilët janë të përfshirë në një veprimtari ekonomike dhe që tentojnë të shmangin detyrimet tatimore nëpërmjet largimit, mosparaqitjes, transferimit të aseteve dhe pasurive të tjera të patundshme etj. Këto vendime ekzekutive janë të detyrueshme per t’u zbatuar nga organet dhe institucionet e tjera shtetërore dhe joshtetërore, të cilat kanë marrëdhenie juridike apo shërbimi me këta persona.