Në zbatim të pikës 4 të nenit 3, nenit 8 të Ligjit Nr. 8978 datë 12.12.2002 "Për taksën vendore për biznesin e vogël", të nenit 5 dhe pikës 7 të nenit 32/6 të Ligjit nr.8979 datë 12.12.2002 "Për disa shtesa dhe ndryshime në ligjin për tatimin mbi të ardhurat "Ministri i Financave dhe Ministri i Pushtetit Vendor dhe Decentralizimit

1. TE PERGJITHSHME

Ministria e Financave, Ministria e Pushtetit Vendor dhe Decentralizimit, organet tatimore qendrore Drejtoria e Përgjithshme e Tatimeve dhe degët e saj në rrethe dhe organet e pushtetit vendor do të bashkëpunojnë ndërmjet tyre për një zbatim sa më efektiv të ligjit nr. 8979, datë 12.12.2002 "Për disa shtesa dhe ndryshime në ligjin "Për tatimin mbi të ardhurat", kapitulli III/A, Tatimi i thjeshtuar mbi fitimin dhe të ligjit nr. 8978 datë 12.12.2002 "Për taksën vendore për biznesin e vogël" dhe udhëzimeve të dala në zbatim të tyre.

Në varësi të ecurisë së zbatimit të këtyre ligjeve dhe udhëzimeve dhe problemeve që do të dalin, kur është e nevojshme, këto institucione do të bashkëpunojnë në fushat e interesit të përbashkët si

rregjistrimi i tatimpaguesve:

shkëmbimi periodik i informacionit mbi tatimpaguesit e regjistruar;

shkëmbimi periodik i informacionit mbi realizimin e të ardhurave;

planifikimi i të ardhurave nga njësitë vendore dhe organet tatimore;

pagesat dhe transferimi i të ardhurave;

bashkëpunimi mbi unifikimin e sistemit të rregjistrimit të të dhënave mbi

tatimpaguesit;

identifikimi i tatimpaguesve të paregjistruar;

kontrolle të përbashkëta mbi rregjistrimi;.

konsulenca të përbashkëta, shkëmbim eksperience, trajnime të ndryshme etj.

Pranë çdo bashkie dhe komune krijohet regjistri i tatimpaguesve.

Në këtë regjistër do të regjistrohen të gjithë tatimpaguesit me të dhëna që lidhen me vendndodhjen e tatimpaguesve, llojin e aktivitetit, etj.

Zyrat e taksave të bashkive dhe komunave, me qëllim evidentimin sa më të saktë të tatimpaguesve, kur bëjnë regjistrimin në regjistër si më lart, duhet të përdorin numrin e identifikimit të regjistrimit pranë organeve tatimore (NIPT- i) dhe kodin vendor të bashkisë ose komunës respektive.

Në kuptim të këtij udhëzimi Kodi vendor është një numër identifikimi i bashkise ose komunes, i cili do të shërbejë për identifikimin e tatimpaguesve dhe të të ardhurave të realizuara prej tyre sipas bashkive dhe komunave respektive.

Kodi vendor përcaktohet nga Ministria e Financave dhe i njoftohet në mënyrë të unifikuar për zbatim Drejtorisë së Përgjithshme të Tatimeve, degëve të tatimeve në rrethe dhe çdo bashkie dhe komune.

Kodi vendor është sipas listës bashkangjitur këtij udhëzimi.

Për këtë qëllim, brenda datës 10 të çdo muaji, dega e tatimeve dërgon pranë çdo bashkie ose komune një listë të tatimpaguesve të regjistruar brenda juridiksionit të tyre gjatë muajit të mëparshëm. Kjo listë identifikon qartë emrin dhe NIPT-in e tatimpaguesit, adresën e vendndodhjes së biznesit dhe kodin vendor të bashkisë ose komunës.

Shkëmbimi periodik i informacionit konsiston në:

- shkëmbimin periodik të informacionit mbi subjektet e regjistruara

Degët e tatimeve në rrethe do t’u dërgojnë bashkive dhe komunave të rretheve respective, çdo datë 10 të muajit pasardhës, një njoftim mbi listën e subjekteve të rregjistruar si tatimpagues të biznesit të vogël, tipin e biznesit (kategorinë për efekt pagese).

Punonjësit e zyrave të taksave në bashki apo komuna si dhe ato të policive bashkiake, në asnjë rast nuk mund të bëjnë kontrolle mbi xhiron e tatimpaguesve të juridiksionit të tyre. Ato mund të bëjnë kontrolle vetëm lidhur me identifikimin e tatimpaguesve të paregjistruar dhe të tatimpaguesve që nuk kanë paguar në kohë detyrimet e tyre, duke informuar perodikisht me shkrim degën e tatimeve të rrethit përkatës.

Kur bashkitë dhe komunat konstatojnë dhe identifikojnë subjekte të paregjistruara, raste kur tatimpagues nuk janë kategorizuar në kategorinë përkatëse sipas dispozitave ligjore dhe nënligjore, ndryshime në të dhënat e tatimpaguesit, mosrespektimin e dispozitave ligjore nga tatimpaguesit etj, dërgojnë për veprim pranë degëve të tatimeve në rrethe informacionin e mësipërm.

Degët e tatimeve përkatëse pas marrjes së informacioneve nga bashkia ose komuna për biznese të cilat nuk janë të pajisura me çertifikatë regjistrimi, marrin masa për t’i regjistruar këto biznese brenda 30 ditëve pas marrjes së informacionit, dhe informojnë bashkinë ose komunën për masat e marra brenda 45 ditëve.

Në raste të veçanta informacioni verifikohet bashkwrisht duke krijuar grupe të përbashkëta me përfaqësues të organeve tatimore dhe bashkive ose komunave.

- shkëmbimin periodik të informacionit mbi planifikimin dhe realizimin e të ardhurave.

Degët e tatimeve në rrethe do t’u dërgojnë bashkive dhe komunave të rretheve respective, çdo datë 10 të muajit pasardhës, informacion mbi shumën e arkëtuar të taksës vendore për biznesin e vogël dhe shumën e tatimit të thjeshtëzuar mbi fitimin.

Bashkitë dhe komunat brenda muajit korrik të vitit korent, me vendim të këshillit vendor, përcaktojnë nivelin e taksës mbi biznesi e vogël për vitin pasardhës, dhe njoftojnë për këtë degën e tatimeve të rrethit përkatës,

Degët e Tatimeve brenda muajit gusht të vitit, në bazë të numrit të subjekteve dhe kategorizimeve të tyre, kryejnë planifikimin e të ardhurave të vitit pasardhës dhe njoftojnë bashkitë dhe komunat brenda këtij afati për arsye të hartimit të projekt buxhetit nga ato.

Pagesa e taksës vendore mbi biznesin e vogel dhe e tatimit të thjeshtuar do të bëhet në llogarinë e degës përkatëse të tatimeve me anë të "formularit të pagesës". Ky formular përmban edhe kodin vendor të bashkisë ose komunës përkatëse, i cili shërben për ndarjen e të ardhurave për efekt të transfertës së tyre në buxhetin e bashkisë / komunës, ku është vendndodhja e biznesit të taksueshëm.

Të ardhurat nga taksa vendore mbi biznesin e vogël dhe tatimin e thjeshtuar mbi fitimin transferohet brenda datës 10 të muajit pasardhës në llogaritë e bashkive /komunave përkatëse.

Ky transferim bëhet nga dega e thesarit të rrethit përkatës, në bazë të listës totale të bashkive /komunave të dërguar nga dega e tatim taksave e rrethit brenda datës 10 të muajit pasardhës, për shumën e arkëtuar për çdo bashki/komune.

Punonjësit e degëve të tatimeve dhe zyrave të taksave nëpër bashki e komuna me miratimin e titullarëve respektive mund të ndërmarrin aksione të përbashkëta për identifikimin dhe regjistrimin e bizneseve që rezultojnë të paregjistruara si dhe për respektimin e afateve ligjore të derdhjes së këtyre detyrimeve. Në këto grupe mund të marrin pjesë dhe strukturat e policisë tatimore dhe ato bashkiake.

Organet tatimore qwndrore dhe vendore, mbi bazën e kërkesave reciproke, organizojnë takime të përbashkëta në kuadër të shkëmbimit të ekperiencës,

Organet tatimore qwndrore ofrojnë asistencë teknike dhe trainime të ndryshme për organet tatimore vendore, me qëllim rritjen e kapaciteteve organizative dhe manaxhimit fiskal në drejtim të administrimit të sistemit të taksave dhe tarifave vendore në përgjithësi dhe taksës mbi biznesin e vogël në veçanti.

Organet tatimore qendore dhe vendore, përveç sa parashikohet në këtë udhëzim mund të trajtojnë në mënyrë më të detajuar çështje të interesit të përbashkët nëpërmjet marrëveshjeve të përbashkëta që mund të lidhin për këtë qëllim.

Ky udhëzim hyn në fuqi menjëherë.