Në mbështetje të nenit 102, pika 4 të Kushtetutës së Republikës së Shqipërisë, si dhe në zbatim të nenit 74 të ligjit Nr.8860, date 22.12.1999

" Për proçedurat tatimore në Republikën e Shqipërisë", si dhe në zbatim të ligjit nr 8977 datë 12.12.2002 "Për sistemin e taksave në Republikën e Shqipërisë", Ministria e Financave nxjerr këtë:

Në zbatim të nenit 7 të ligjit Nr.8977, date 12.12.2002, taksat kombëtare derdhen 100% në buxhetin e shtetit .

Taksat vjetore arkëtohen nga agjentët e taksave brenda tremujorit të parë të vitit në vazhdim. Kur detyrimi për herë të parë lind në fillim të vitit taksat paguhen në masën 100%, ndërsa kur detyrimi i vjeljes së taksave për herë të parë lind 6 mujorin e dytë paguhet 50% e masës së taksës së përcaktuar në ligj. Në kuptimin e detyrimit të vjeljes së taksave vjetore për herë të parë kuptojmë :

Shembull: Për vjeljen e taksës së tonazhit per aks te mjeteve, kur një mjet regjistrohet dhe paguan taksën e tonazhit për aks për herë të parë në Drejtoritë Rajonale të Drejtorisë së Përgjithshme të Shërbimeve të Transportit Rrugor 6 mujorin e parë, ai paguan 100% të taksës , ndërsa kur mjeti regjistrohet 6 mujorin e dytë ai paguan 50 % të taksës. Për vitet në vazhdim kjo taksë do të paguhet në fillim të tremujorit të parë në masën 100%.

Në zbatim të nenit 9, agjentët e taksave të përcaktuar në nenin 6 të ligjit, përfitojnë një përqindje të caktuar të arkëtimeve nga taksat. Punonjësit e taksave në degët e tatimeve në rrethe bëjnë akt rakordime me agjentët e taksave për taksat e vjela, si dhe përcaktojnë shumën që u takon agjentëve të taksave. Aktin e rakordimit, i cili do të jetë i firmosur nga inspektori i taksave, përfaqësuesi i agjentit të taksave si dhe nga Kryetari i Degës së Tatimeve, agjentët e taksave duhet ta paraqesin në degën e thesarit të rrethit ku ushtrojnë aktivitetin e vjeljes së taksave.

Kriteret e përdorimit të komisioneve që ju jepen agjentëve të taksave janë përcaktuar në ligj dhe përdoren për shpërblime të punonjësve që merren me vjeljen e taksave. Drejtuesi i agjentit të taksave cakton punonjësit që merren me vjeljen e taksave. Këta punonjës përgjigjen për vjeljen dhe arkëtimin e taksave sipas ligjit.

Gjithashtu komisionet përdoren edhe për përballimin e shpenzimeve të vjeljes së taksave si shtypshkrime, komisione bankare etj. Në zbatim të nenit 6 të ligjit agjentët e taksave janë të detyruar të bëjnë vjeljen e taksave dhe të derdhin në buxhet shumat e vjela sipas ligjit "Për proçedurat tatimore në Republikën e Shqipërisë".

Sipas llojit të taksave :

1. Taksat portuale.

Ngarkohen me vjeljen e këtyre taksave kapiteneria e porteve, e cila i vjel këto taksa drejtpërdrejt ose nëpërmjet agjensive detare shtetërore ose private.

Taksat portuale paguhen nga anijet shqiptare ose të huaja sa herë prekin portet e Republikës së Shqipërisë për veprime tregtare në bazë të nivelit të taksave të përcaktuara në lidhjen Nr.1 të ligjit "Për sistemin e taksave në Republikën e Shqipërisë".

Konsiderohen veprime tregtare dhe jo tregtare veprimet të cilat janë përcaktuar në nenin 5 të ligjit.

Taksat portuale paguhen me mbritjen e anijes dhe janë të vlefshme për të gjithë kohën që anija qëndron në port.

Taksat portuale paguhen në secilin port të Shqipërisë pavarësisht nëse anija mbërrin nga jashtë ose nga një port tjetër i shtetit shqiptar.

Pagesat e taksave nga anijet tregtare të huaja bëhen me EURO. Për anijet e personave juridik apo fizik shqiptarë shtetëror apo privat taksat llogariten dhe paguhen në lekë ose valutë, duke e konvertuar me kursin e bankës.

Anije të subjekteve shqiptare do të konsiderohen anijet që janë në pronësi të vet dhe anijet e marra me qira.

Të gjitha përjashtimet nga pagesat e taksave portuale të parashikuara në këtë ligj do të regjistrohen në regjistër.

2. Taksat për shërbimet konsullore

Ngarkohen me vjeljen e kësaj takse Ministria e Punëve të Jashtme dhe

Ministria e Rendit Publik. Shtetasit që pajisen me pasaportë për dalje jashtë shtetit, përveç pagimit të vlerës së pasaportës do të paguajnë dhe taksën të përcaktuar në pikat 1, 2, të lidhjes Nr. 2 "Taksat për shërbimet konsullore".

Për shërbimet që kryhen nga përfaqësitë tona diplomatike në vende të tjera, pagesat e taksave bëhen në EURO siç janë përcaktuar në lidhjen Nr. 2 " Për taksat për shërbimet konsullore". Nga ana e Ministrisë së Jashtme çdo muaj do të derdhet në degën e thesarit Tiranë shuma e taksave konsullore të arkëtuara nga përfaqësitë tona diplomatike jashtë shtetit. Dega e thesarit pasi bën rakordimet e nevojshme me Ministrinë Jashtme, në fund të çdo muaji shumën e taksave konsullore e derdh në llogarinë e Drejtorisë së Përgjithshme të Tatimeve.

Me termin përfaqësi kuptohet përfaqësia diplomatike apo konsullore e Republikës së Shqipërisë jashtë shtetit.

Taksa nga Përfaqësitë mund të arkëtohet edhe në monedhën e vendit të konvertuar me kursin e këmbimit në EURO në momentin e derdhjes së taksës.

Taksat për veprimet konsullore arkëtohen me fillimin e proçedurës përkatëse.

Institucionet shtetërore që do të presin shtetas të huaj, të cilët janë të përjashtuar nga pagesa e taksës së vizës ose të hyrjes së tyre në territorin e Republikës së Shqipërisë i konfirmojnë pikave të kalimit të kufirit, emrat e personave të cilët janë të përjashtuar. Konfirmimi për këtë qëllim jepet vetëm nga titullari i institucionit shtetëror.

Ministria e Jashtme i dërgon Ministrisë së Rendit Publik, listën e taksës së vizës dhe të hyrjes. Ministria e Rendit Publik dërgon në PKPK listën e taksës së vizës ose të hyrjes.

Taksa e hyrjes ose taksa e vizës paguhet në EURO, ose valutë tjetër lirisht të konvertueshme.

Me vjeljen e taksës së hyrjes në territorin e Republikës së Shqipërisë ngarkohen PKPK.

Me vjeljen e taksës së vizës ngarkohen Përfaqësitë. Në rastet kur viza jepet në kufi taksa e vizës arkëtohet nga PKPK mbi bazën e konfirmimit nga Dega e vizave në Ministrinë e Rendit Publik.

Vjelje e taksës së hyrjes ose të vizës në PKPK dokumentohet me mandat arkëtimi, i cili duhet të përmbajë veç shënimeve standarte edhe shtetësinë e paguesit, numrin rendor të regjistrit të hyrjes të shtetasve të huaj, llojin e monedhës që derdh i huaji. Mandati i arkëtimit përpilohet nga kontrolli i shërbimit te PKPK, në dy kopje, njërën nga të cilat ia jep qytetarit të huaj dhe tjetrën e mban vetë. Në dalje të PKPK vendoset një kontroll i dytë i policisë kufitare që kontrollon nëse është bërë pagesa apo jo.

Në aeroportin e Rinasit mandate arkëtimet dhe vjelja e valutës bëhet nga arkëtarja e policisë kufitare.

Për regjistrimin dhe kontrollin e mjeteve monetare në arkë kontrollori i shërbimit ( arkëtarja në ato pika kalimi kufitar ku është vendosur arkëtari) të gjitha mandat arkëtimet i regjistron në librin e arkës sipas numrit kronologjik rritës për secilën lloj monedhe. Libri i arkës nënshkruhet për çdo datë nga Komandanti ose kryekontrollori i PKPK.

Të ardhurat e realizuar nga vjelja e taksave derdhen menjëherë në llogarinë e Degës së Tatimeve dhe Taksave në rrethet ku ka PKPK nga kontrolli përkatës ose nga arkëtarja në ato PKPK ku ka arkëtare.

3. Taksa vjetore e tonazhit të mjeteve për aks.

Taksa e tonazhit për aks arkëtohet brënda tremujorit të parë të vitit në vazhdim. Kjo llogaritet sipas lidhjes Nr. 3 të ligjit "Për sistemin e taksave në Republikën e Shqipërisë". Theksojmë se në lidhje është përcaktuar masa e taksës për një aks dhe kjo taksë duhet të shumëzohet me numrin e akseve që ka mjeti. Zotëruesi i mjetit pajiset nga Drejtoritë Rajonale të Shërbimeve të Transportit Rrugor me një dokument që vërteton pagesën e kësaj takse si dhe me pullën e taksës , të cilën zotëruesi i mjetit është i detyruar ta vendosë në xhamin e përparmë të mjetit. Këto dokumenta duhet të përmbajë elemente të sigurisë së lartë për të shmangur fallsifikimin.

Drejtoritë Rajonale të Drejtorisë së Përgjithshme të Shërbimeve të Transportit Rrugor nuk do të bëjnë kontrollin teknik të mjeteve në rastet kur zotëruesi i mjetit nuk ka paguar taksën e tonazhit për aks.

Drejtoria e Përgjithshme e Shërbimit të Transportit Rrugor dhe Drejtoria e Përgjithshme e Tatimeve duhet të ndjekin në vazhdimësi vjeljen e këtyre taksave duke ushtruar kontrolle të vazhdueshme në pikat rrugore.

Drejtoria e Qarkullimit Rrugor pranë Ministrisë së Rendit Publik, nëpërmjet Degëve të Qarkullimit Rrugor në rrethe bën kontrollin e vjeljes së taksës së tonazhit për aks të mjeteve.

Punonjësit e taksave në Degët e Tatimeve në rrethe bëjnë akt rakordime me punonjësit e Drejtorive Rajonale të Drejtorisë së Përgjithshme të Shërbimit të Trasportit Rrugor në rrethe dhe punonjësit e Degëve të Qarkullimit Rrugor në rrethe për taksat e vjela, ku përcaktojnë edhe shumën që u takon Drejtorive Rajonale të Drejtorisë së Përgjithshme të Shërbimeve të Transportit Rrugor dhe Degëve të Qarkullimit Rrugor. Ky akt dorëzohet në Degën e Thesarit të rrethit ku ushtrojnë aktivitetin e vjeljes së taksave edhe çdo muaj por gjithmonë brenda vitit kalendarik.

Në zbatim të ligjit, përjashtohen nga taksa e tonazhit për aks mjetet në pronësi të personave fizikë e juridikë, të cilët deklarojnë se gjatë vitit vijues kalendarik nuk do të punojnë dhe për këtë zotëruesi i mjetit duhet që brenda muajit Janar të dorëzojë në Drejtorinë e Përgjithshme të Shërbimeve të Transportit Rrugor (në Drejtorinë Rajonale të rrethit ku është regjistruar mjeti), targën dhe lejen e qarkullimit.

Drejtoria Rajonale verifikon pagesat e taksave të viteve të mëparshme, si dhe të gjitha detyrimet që mund të ketë dhe mbas pagesës së detyrimeve jep të drejtën e përjashtimit. Të gjitha përjashtimet duhet të shënohen në një regjistër të veçantë.

4. Taksa e qarkullimit të automjeteve të huaja.

Me vjeljen e kësaj takse ngarkohen degët e doganave në pikat e kalimit kufitar. Shtetasit e huaj në momentin e hyrjes në territorin e Republikës së Shqipërisë me automjete me targë të huaj, pajisen nga degët e doganave me një vërtetim hyrje sipas modelit bashkëngjitur këtij udhëzimi. Ky vërtetim duhet të jetë me numër serial dhe të mbahet në dy kopje, nga e cila njëra do t'i jepet personit që hyn në territorin e Republikës së Shqipërisë me automjet me targë të huaj, ndërsa kopja tjetër do të ruhet në degët e doganave. Ky vërtetim është i detyrueshëm të paraqitet në Degën e Doganës në pikën e kalimit kufitar në dalje, me qëllim që degët e doganave të llogarisin dhe arkëtojnë taksën e qarkullimit të automjetit me targë të huaj dhe të arkëtojnë taksën për ditët e qëndrimit në territorin e Republikës së Shqipërisë. Kjo pagesë do të bëhet me mandat arkëtime nga të cilat një kopje i jepet taksa paguesit, kopja tjetër i bashkëngjitet vërtetimit që paraqet shtetasi i huaj në dalje dhe ruhet në degën e doganës.

Për rastet kur automjeti me targë të huaj, me anën e aktit noterial kalon në pronësi të personave të tjerë dhe do të pajiset me targë shqiptare, pronari duhet t'i paraqesë degës së doganës në momentin e çdoganimit të automjetit dhe vërtetimin e hyrjes që i është dhënë shtetasit të huaj në pikën e kontroll kalimit kufitar në hyrje, me qëllim që të llogaritet edhe taksa e qarkullimit të automjetit për ditët e qëndrimit.

Degët e Shërbimeve të Transportit Rrugor nuk do të bëjnë pajisjen me targa shqiptare, si dhe regjistrimin e mjetit pa u paguar detyrimet e taksës së qarkullimit të automjeteve të huaja.

Të gjitha taksat e arkëtuara mbahen në një regjistër të veçantë nga degët e doganave në pikat e kalimit kufitar, ku shënohet lloji i mjetit, ditët e qëndrimit si dhe shuma e taksës së paguar.

Në zbatim të nenit 10 të ligjit, përfituesit e përjashtimeve nga pagimi i kësaj takse do të paraqesin pranë degës së tatimeve të rrethit ku ushtrojnë aktivitetin e tyre një kërkesë ku të jenë përcaktuar automjetet me targë të huaj sipas tipeve, numrin e shasisë, motorit si dhe targën përkatëse. Pas paraqitjes së dokumentave degët e tatimeve duhet t'i pajisin ato me dokument sipas modelit bashkëngjitur ku të shënohet automjeti sipas tipit, numrit të shasisë, e motorit, targa dhe periudha e përjashtimit.

Me paraqitjen e vërtetimeve të lëshuara nga degët e Tatimeve, degët e doganave në hyrje do të lëshojnë një vërtetim të veçantë me numër serial të bashkëngjitur në dy kopje, një prej të cilëve i jepet zotëruesit të mjetit, ndërsa kopja tjetër ruhet në degën e doganës.

Në dalje të mjetit me targë të huaj nga territori i Republikës së Shqipërisë, degët e doganave detyrohen t’u marin zotëruesve të mjeteve të firmave të përbashkëta ose të huaja kopjen e vërtetimit që ju është dhënë në momentin e hyrjes në territorin shqiptar dhe t'i regjistrojë këto vërtetime në një regjistër të veçantë.

Me vjeljen e kësaj takse ngarkohen degët e doganave dhe paguhet nga importuesi i automjetit në momentin e çdoganimit të automjetit.

Degët e doganave bëjnë llogaritjen e taksës. Llogaritja e kësaj takse është e diferencuar sipas vitit te prodhimit, llojit të automjetit.

Degët e doganave të gjitha arkëtimet nga taksat i regjistrojnë në një regjistër të veçantë ku shënojne llojin e mjetit sipas përcaktimit të bërë në ligjin për sistemin e taksave, emrin e zotëruesit të mjetit, vitin e prodhimit si dhe shumën e taksës.

Taksa për pajisjen me leje drejtimi për drejtim automjeti arkëtohet nga Drejtoritë Rajonale të Drejtorisë së Përgjithshme të Shërbimeve të Transportit Rrugor. Detyrimi i pagimit të kësaj takse lind në momentin e dhënies së dëshmisë së aftësisë për drejtim automjeti. Shtetasi duhet të pajiset me dokumentin që vërteton pagimin e kësaj takse.

Të gjitha pagesat e taksës do të regjistrohen në një regjistër të veçantë. Në regjistër do të shënohet emri, mbiemri i personit që pajiset me dëshmi për drejtim automjeti, grupi përkatës i dëshmisë së aftësisë dhe masa e taksës së paguar.

7. Taksa e përdorimit të aparateve radio televizive.

Me vjeljen e kësaj takse ngarkohen zyrat e pagesës së energjisë elektrike dhe vjelja e kësaj takse duhet të bëhet brenda tremujorit të parë.

Kjo taksë paguhet për marrësit radiofonikë dhe televizivë individuale që janë në gjëndje teknike të marrin programe të radios ose të televizionit.

Për çdo familje merret në konsideratë vetëm një marrës i çdo lloji. Kur familjet kanë vetëm marrës radio ato do të paguajnë vetëm taksën për radion. Për këtë ata duhet të njoftojnë në degën e tatimeve të rrethit ku banojnë, e cila do të verifikojë në se ka vetëm aparat televiziv dhe i jep vërtetimin me firmën e kryetarit të degës. Kur familja ka vetëm marrës televiziv do të ndiqet e njëjta proçedurë si në rastin e marësit radiofonik.

Personat fizikë e juridikë do të paguajnë taksën për përdorimin e aparaturave radio televizive për të gjitha aparaturat që disponojnë në ambientet e tyre.

Degët e tatimeve në rrethe të bashkëpunojnë me zyrat e pagesës së energjisë elektrike për njoftimin dhe pagimin nga ana e zotëruesve të taksës së aparateve radiotelevizive të taksave .

Pagesat e taksës do të vërtetohen për përdoruesit në librezën e pagesës së energjisë elektrike ku do të shënohet "Paguar taksa për vitin ____, data e pagesës si dhe firma dhe vula e punonjësit të ngarkuar me vjeljen e kësaj takse.

Këto taksa do të shënohen në një regjistër të veçantë ku të shënohen të gjithë taksapaguesit, shuma e pagesës dhe data kur është kryer pagesa.

8. Taksa e përdorimit të numrit telefonik

Me vjeljen e kësaj takse ngarkohen operatorët përkates të numrit telefonik dhe paguhet brenda tremujorit të parë të çdo viti. Pagesa e kryer do të vërtetohet në librezën e pagesës së telefonit për telefonat kabllore ku do të shënohet " paguar taksa e telefonit për vitin ____ si dhe firma e punonjësit të ngarkuar për vjeljen e kësaj takse dhe vula.

Për telefoninë celulare pagesa e taksave të zotëruesve të aparateve celularë bëhet nga operatorët celularë, të cilët janë përgjegjës për vjeljen e taksave. Degët e tatimeve bëjnë çdo muaj rakordimet për numrat celularë të shitur si dhe kontrollin e derdhjes së taksave .

Me vjeljen e këtyre taksave ngarkohen Ministria e Drejtësisë, organet gjyqësore, Prokuroria, Zyrat e noterisë dhe Zyrat e regjistrimit të Pasurive të paluajtshme. Këto taksa paguhen në momentin e kryerjes së veprimeve sipas lidhjes Nr. 5 të ligjit dhe bëhen me anën e pullës ose me mandat arkëtim për ato raste kur kjo taksë nuk vilet me anën e pullës. Pullat e taksave vendosen në çdo kopje të dokumentit të lëshuar për të gjitha dokumentat që sipas ligjit duhet të pajisen me pulla takse. Dokumentat janë të vlefshme kur pulla e taksës është e vulosur nga organi që kryen shërbimin. Për plotësimin e vlerës së pullës për aktet që lëshohen mund të përdoren një ose më shumë pulla, me kusht që ato të përmbajnë vlerën sa është masa e taksës.

Në rast se personi do të kërkojë kopje të akteve apo dokumentave të lëshuara nga organet gjyqësore, noteriale vlera e pullës së taksës është përcaktuar në lidhjen Nr. 5 të ligjit, me kusht që tek akti ose dokumenti të jetë shënuar fjala "kopje". Në rast të kundërt do të merret vlera e plotë e taksës.

Taksa e paguar nuk kthehet kur hiqet dorë nga kryerja e veprimeve gjyqësore, noteriale.

Me vjeljen e kësaj takse ngarkohen universitetet dhe shkollat e tjera të larta dhe arkëtohen në momentin e fillimit të vitit të ri shkollor, për çdo vit arsimor.

Pagesat e taksave regjistrohen në regjistër dhe derdhen në llogarinë e Degës së Tatimeve.

Me vjeljen e këtyre taksave ngarkohet Enti Rregullator i Telekomunikacioneve (ERT). Llogaritjet teknike të taksave bëhen nga ERT sipas lidhjes Nr.6 . ERT nuk jep liçensë subjekteve fizike apo juridike për përdorimin e sistemeve të radiokomunikimit pa vjelë taksat.

ERT njofton Drejtorinë e Përgjithshme të Tatimeve për rastet kur subjektet nuk rinovojnë liçensat si dhe në rastet e identifikimit të përdorimit abuziv të spektrit të frekuencave dhe bashkëpunojnë së bashku për shmangjen e evazionit fiskal në këtë fushë.

Të gjitha taksat e vjela do të regjistrohen në një regjistër të veçantë.

Me vjeljen e kësaj takse ngarkohet Këshilli Kombëtar i Radio Televizionit (KKRT). Llogaritjet teknike të taksës bëhen nga KKRT sipas lidhjes Nr.9 te ligjit.

KKRT njofton Drejtorinë e Përgjithshme të Tatimeve kur subjektet nuk paguajnë taksën vjetore të sherbimeve te trasmetimeve radiotelevizive, kur nuk rinovojnë liçensat si dhe në rastet e identifikimit të transmetimeve të paliçensuara.

Të gjitha këto taksa arkëtohen menjëherë në buxhetin e shtetit dhe evidentohen nga KKRT në një regjistër të veçantë.

13. Taksa e kalimin me avion të kufirit shtetëror të Republikës së Shqipërisë.

Me vjeljen e kësaj takse ngarkohet Dega e Doganës Rinas. Kjo taksë do të arkëtohet nëpërmjet biletës së taksës të cilat janë me numër serial. Çdo shtetas i huaj apo shqiptar është i detyruar të paguajë taksën me paraqitjen e biletës së udhëtimit me avion. Dega e doganës Rinas pajis shtetasin me biletën e taksës që i bashkëngjitet biletës së avionit. Kjo biletë vuloset nga ana e Degës së Doganës Rinas duke shënuar datën dhe orën e udhëtimit.

Të gjithë personat që në bazë të ligjit përjashtohen nga pagimi i taksës së kalimit të kufirit me avion do të pajisen me një vërtetim me numër serial të firmosur nga kryetari i Degës së Doganës. Ky vërtetim do të jetë në dy kopje njëra do të mbetet në degën e doganës. Të gjithë përjashtimet do të regjistrohen në një regjistër të veçantë ku të shënohet emri, mbiemri i personit, numri i pasaportës, data dhe orari i fluturimit

Të gjithë shtetasit e huaj a vendas janë të detyruar të ruajnë biletën e taksës dhe vërtetimin e përjashtimit nga pagesa e taksës.

Në fund të ditës do të bëhet rakordimi i Degës së Doganës Rinas me PKPK Rinas dhe agjensive ajrore.

Pagesa e taksës përballohet nga vetë shtetasit shqiptare apo të huaj. Për rastet kur shtetasit shkojnë me shërbim jashtë atdheut pagesa e taksës përballohet nga institucioni që e dërgon me sherbim. Shtetasit paguajnë në doganë taksën e kalimit të kufirit me avion dhe me paraqitjen e biletës së taksës institucioni është i detyruar të bëjë rimbursimin e saj.

Arkëtimet e çdo dite do të regjistrohen në një regjistër të veçantë dhe të derdhen menjëhere në llogarinë e degës së tatimeve.

Me vjeljen e kësaj takse ngarkohet Kapiteneria e Porteve. Pasaporta e lundrimit është dokument identifikimi i pjestarëve të ekuipazheve të anijes ose personave të tjerë që mund të punojnë dhe udhëtojnë me këto anije. Kjo taksë derdhet menjëherë në llogarinë e degës së tatimeve. Kapiteneria e porteve i regjistron në një regjistër të veçantë të gjitha pasaportat e lundrimit që janë lëshuar duke shënuar, emrin, mbiemrin e punonjësit që i jepet pasaporta e lundrimit.

Kjo taksë është vjetore dhe me vjeljen e saj ngarkohet Drejtoria e Përgjithshme e Peshkimit.

Pagesat e kësaj takse bëhen sipas lidhjes Nr.7 të ligjit. Detyrimi për pagimin e kësaj takse lind në momentin e marjes së lejes për ushtrimin e aktivitetit të peshkimit. Drejtoria e Peshkimit i regjistron në një regjistër të veçantë të gjitha lejet e dhëna ku të përcaktohet subjekti që merr lejen, data, lloji i gjuetisë së peshkimit, tipi i mjetit dhe masa e taksës së paguar. Lejet për ushtrimin e aktivitetit të peshkimit do të jepen mbasi të jetë paguar taksa përkatëse.

Vjelja e këtyre taksave bëhet nga zyrat e gjëndjes civile. Shtetasit për çdo dokument të lëshuar nga zyrat e gjëndjes civile janë të detyruar të paguajnë taksën sipas lidhjes Nr. 5 të ligjit. Dokumentat e gjëndjes civile janë të vlefshme vetëm kur kanë pullën e taksës të vulosur me vulën e gjëndjes civile.

Shtetasit shqiptarë që pajisen me pasaportë do të paguajnë përveç vlerës së pasaportës edhe taksën. Vjelja e kësaj takse do të bëhet me mandat arkëtim dhe kjo pagesë do të shënohet në një regjistër të veçantë.

17. Taksa për ulje ngritjen e avionëve dhe qëndrimin e tyre në aeroport.

Vjelja e kësaj takse bëhet nga Albtransporti. Pagesat e taksave do të bëhen në valutë sipas lidhjes Nr.8 bashkëngjitur ligjit. Arkëtimet e taksave aeroportuale do të regjistrohen në një regjistër të veçantë, ku të regjistrohen të gjithë fluturimet e avionëve, lloji i avionit, pesha e tij dhe masa e taksës së vjelë dhe do të derdhen në llogarinë e buxhetit të shtetit ( Dega e Tatimeve Tiranë) .

Me vjeljen e kësaj takse ngarkohet Drejtoria e Përgjithshme e Aviacionit Civil (DPAC), nëpërmjet Agjensisë Nacionale të Trafikut Ajror (ANTA). Të ardhurat nga kjo taksë arkëtohen në valutë dhe transferohen në llogarinë e buxhetit të shtetit (Dega e Tatimeve Tiranë).

Për të gjithë avionët që përjashtohen nga pagimi i taksave aeroportuale, DPAC do të dërgojë pranë ndërmarjeve të saj urdhërin me shkrim, për avionët që përjashtohen sipas ligjit. Përjashtimet do të regjistrohen në një regjistër të veçantë.

Me vjeljen e kësaj takse ngarkohen Degët e tatimeve dhe taksave në rrethe. Leja për shfrytëzimin e pasurisë minerare jepet nga Ministria e Ekonomisë Publike dhe Privatizimit. Zotëruesi i lejes duhet të regjistrohet në organet tatimore dhe brenda datës 15 të muajit pasardhës duhet të derdhë për llogari të degës së tatimeve dhe taksave ku ushtron aktivitetin e tij taksën e rentës së pasurisë të specifikuar në nenet 51, 74 dhe 83 të ligjit minerar, sipas vlerës së tregut të mineraleve të shitura konsumatorëve gjatë muajit.

Për të përcaktuar vlerën e tregut të këtyre mineraleve me qëllim që të llogaritet renta e pasurisë minerare veprohet si vijon:

1. Vlera e tregut të mineralit të shitur tek konsumatori gjatë muajit kalendarik jepet:

a) Në rastin kur produkti i shitur është mineral i nxjerrë nga miniera vlera e tregut të mineralit është e barabartë me çmimin e shitjes së produktit.

b) Në rastin kur produkti përfundimtar i shitur është përpunuar më tej, vlera e tregut të mineralit është e barabartë me çmimin e shitjes së produktit përfundimtar gjatë muajit kalendarik minus:

b.1. Shpenzimet e pasurimit, shkrirjes dhe rafinimit që janë kryer mbi mineralin.

b.2. Shpenzimet e transportit nga miniera në fabrikën e pasurimit, shkritore ose impiante e rafinimit të mineralit.

b.3. Të gjitha shpenzimet e tjera të cilat nuk janë zbritur në pikën 1 dhe që lidhen me kostot e pasurimit, shkrirjes ose rafinimit.

2.Çmimi i shitjes nënkupton:

2.1 Ne qofte se produkti eksportohet çmimi i shitjes është F.O.B Shqipëri

2.2 Ne qofte se produkti nuk eksportohet çmimi i shitjes është i barabartë me çmimin e shitjes në Shqipëri minus:

-Shpenzimet e transportit të produktit nga pika e prodhimit deri në pikën e shitjes F.O.B Shqipëri

-Shpenzimet e tjera të shitjes nëse ka të tilla.

Zotëruesi i lejes, duhet të dorëzojë brenda datës 5 të muajit këto të dhëna:

a) Emrin dhe përshkrimin e mineralit

b) Emrin dhe adresën e zotëruesit të lejes dhe administratorit

c) Sasinë e mineralit të prodhuar gjatë muajit të kaluar

d) Një konfirmim lidhur me prodhimin e muajit të kaluar dhe shpërndarjen e tij (psh. tek konsumatorët, fabrikat e pasurimit, shkritoret, rafineritë ose të depozituar)

e) Sasinë e mineralit të shitur tek konsumatorët gjatë muajit kalendarik, emrat dhe adresat e blerësve dhe kontratat e shitjes të cilat duhet të përmbajnë veçoritë mbi natyrën, cilësinë dhe përmbajtjen e mineraleve.

f) Emrat dhe vendndodhjet e fabrikave të pasurimit, shkritoreve dhe rafinerive ku është shpërndarë minerali.

g) Koston për ton të fabrikës së pasurimit, shkritoreve, dhe rafinerive ku është shpërndarë minerali gjatë muajit kalendarik.

h) Koston për ton të transportit të mineralit të shitur gjatë muajit kalendarik e detajuar kjo në rastin kur transporti i mineralit kryhet duke kaluar në disa hallka transporti.

i) Shpenzimet e shitjes nëse ka dhe që janë kryer gjatë muajit kalendarik

j) Një llogaritje të detajuar të rentës së pasurisë minerare gjatë muajit kalendarik.

Zotëruesi i lejes së shfrytëzimit duhet të mbajë pranë minierës librat përkatës të prodhimit të mineralit nga zona e lejuar dhe të gjithë dokumentacionin që lidhet me to. Të gjitha të dhënat mbi prodhimin, transportin përpunimin dhe shitjen, përfshirë këtu dhe kontratat e shitjes kontrollohen nga degët e tatimeve dhe taksave.

a) Mbitaksa për importet e taksueshme

b) Taksa mbi konsumin e karburantit

c) Taksa vjetore nga tatimpaguesit e TVSH-së

Në zbatim të ligjit ngarkohen me llogaritjen dhe vjeljen e taksave:

Për mbitaksën e importeve të taksueshme Drejtoria e Përgjithshme e Doganave nëpërmjet degëve të saj. Kjo takse do të jetë në masën 1% të vlerës doganore dhe do të aplikohet mbi të gjitha mallrat e importit të taksueshme me taksë doganore duke filluar nga niveli 0.

Taksa mbi konsumin e karburantit është caktuar në masën 3 lekë për litër gazoil, benzinë dhe benzol:

- për benzinën, benzolin dhe gazoilin e importuar taksa do të arketohet nga Drejtoria e Përgjithshme e Doganave, nëpërmjet Degëve të saj në rrethe,

- për gazoilin, benzinën dhe benzolin e prodhuar në vend taksa do të arkëtohet nga Drejtoria e Përgjithëshme e Tatimeve, të cilën ajo e vjel nëpërmjet prodhuesve të këtyre produkteve.

- Për gazoilin, benzinën dhe benzolin e importuar fillimisht do të aplikohet mbitaksa në masën 1 % mbi vlerën doganore dhe në vijim taksa mbi konsumin e karburantit në masën 3 lekë për litër.

-Taksa vjetore nga tatim paguesit e TVSH-së do të arkëtohet nga Degët e tatimeve në rrethe për të gjithë subjektet e regjistruara në TVSH. Si taksë vjetore kjo do të arkëtohet brenda tremujorit të parë të vitit.

-Mbi taksa për importet e taksueshme dhe taksa mbi konsumin e karburantit për gazoilin, benzinën dhe benzolin e importuar do të aplikohet në momentin e deklarimit të mallrave për t’u vendosur në qarkullim të lirë, ndërsa për gazoilin, benzinën, benzolin të prodhuar në vend në momentin e levizjes së këtyre produkteve nga vendi i prodhimit.

Mbitaksa për importet e taksueshme dhe taksa mbi konsumin e karburantit për gazoilin, benzinën dhe benzolin e importuar janë taksa ekstra, që nuk do të përfshihen në bazën e taksueshme për efekt të llogaritjes të Taksës Doganore, TVSH-së dhe Akcizës.

Mbitaksa për importet e taksueshme dhe taksa mbi konsumin e karburantit për gazoilin, benzinën dhe benzolin e importuar, nuk do të aplikohet për mallrat që vendosen në një nga regjimet doganore pezulluese, por do të aplikohet në momentin kur mbyllja e regjimit përfundon me destinacionin e vendosjes në qarkullim të lirë.

Të ardhurat nga taksat kombëtare në zbatim të ligjit do të derdhen në llogaritë e buxhetit në një llogari të veçantë të emërtuar "Taksa e rrugës Durrës - Kukës" .

- Taksa e karbonit për benzinën , benzolin dhe gazoilin është caktuar në masën 0.5 lekë për litër për benzinën, benzolin dhe 1 lekë për litër për gazoilin.

Për benzinën, benzolin dhe gazoilin e importuar ngarkohet Drejtoria e Përgjithshme e Doganave, nëpërmjet Degëve të saj në rrethe. Taksa aplikohet në momentin e deklarimit të mallrave për t’u vendosur në qarkullim të lirë.

Për gazoilin, benzinën dhe benzolin e prodhuar në vend me vjeljen e taksës ngarkohet Drejtoria e Përgjithshme e Tatimeve, e cila e vjel këtë taksë tek prodhuesit e këtyre produkteve në momentin e lëvizjes së këtyre produkteve nga vendi i prodhimit.

Taksa e karbonit për benzinën, benzolin dhe për gazoilin e importuar janë taksa ekstra, që nuk do të përfshihen në bazën e taksueshme për efekt të llogaritjes të Taksës Doganore, TVSH-së dhe Akcizës.

Taksa e karbonit për benzinën, benzolin dhe gazoilin e importuar, nuk do të aplikohet për mallrat që vendosen në një nga regjimet doganore pezulluese, por do të aplikohet në momentin kur mbyllja e regjimit përfundon me destinacionin e vendosjes në qarkullim të lirë.

Taksa e ambalazheve plastike të lëngjeve të importuar apo të prodhuar në vend llogaritet në masën 2 lekë për copë për ambalazhet e lëngjeve me kapacitet mbi 1.5 litra dhe 1 lekë për copë për ambalazhet me kapacitet 1.5 litra dhe më pak se 1.5 litra. Për mallrat e importuara kjo taksë arkëtohet nga Drejtoria Përgjithshme e Doganave nëpërmjet Degëve të saj.

Taksat e ambalazheve plastike të lëngjeve janë taksa ekstra dhe nuk do të përfshihen në bazën e taksueshme për efekt të llogaritjes të Taksës Doganore, TVSH-së dhe Akcizës.

Taksa për ambalazhet plastike të lëngjeve nuk do të aplikohet për mallrat që vendosen në një nga regjimet doganore pezulluese, por do të aplikohet në momentin kur mbyllja e regjimit përfundon me destinacionin e vendosjes në qarkullim të lirë.

Për ambalazhet plastike të lëngjeve bosh që importohen , taksa nuk do të llogaritet në momentin e çdoganimit të mallit, por tek prodhuesi i lëngjeve.

Për mallrat e prodhuara në vend dhe të ambalazhuara me ambalazhe plastike vjelja e taksës bëhet nga Drejtoria e Përgjithshme e Tatimeve nëpërmjet Degëve të saj.

Prodhuesit për prodhimin e lëngjeve të ambalazhuar në ambalazhe plastike bëjnë llogaritjen e taksës të cilën e derdhin në llogarinë e tatimeve.

Degët e tatimeve në rrethe të evidentojnë subjektet që prodhojnë produktet e ambalazhuara në ambalazhet plastike , të bëjnë kontrolle për llogaritjen korekte të taksës dhe derdhjen në afatet ligjore të saj .

Ky udhëzim hyn në fuqi me hyrjen në fuqi të ligjit Nr.8977 , datë 12.12.2002