Të gjithë personat, përfshirë personat juridikë, ortakëritë, personat fizikë tregtarë residentë tatimorë në Shqipëri, organet e qeverisjes qëndrore apo vendore, organizatat jofitimprurëse, dhe çdo ent apo person juridik i krijuar si i tillë në Shqipëri, që bën pagesë të çdonjerës nga llojet e pagesave që listohen më poshtë, janë të detyruar të mbajnë tatim në burim në masën 10 % të pagesës dhe ta derdhin atë në organin tatimor përkatës jo më vonë se data 15 e muajit që pason muajin në të cilin është kryer pagesa.

•  dividentët;

•  ndarjet e fitimit;

•  interesat,

•  pagesat për të drejtat e autorit dhe të pronësisë intelektuale;

•  pagesat për shërbimet teknike;

•  pagesat për menaxhim e për pjesëmarrje në këshillat drejtues;

•  pagesat për ndërtim, instalim, montim ose punë mbikëqyrëse;

•  pagesat për qiratë;

•  pagesat për argëtues, artistë ose sportistë, në një shfaqje ose prezantim në Republikën e Shqipërisë dhe pagesa të tilla, bërë personave juridikë ose ortakërive, të cilët punësojnë argëtues, artistë ose sportistë ose ndërmjetësojnë shfaqje a prezantime të tilla;

•  çdo pagesë tjetër e bërë për shërbime, jo për mallra, që nuk përfshihet në pikat e mësipërme.

Mekanizmi i mbajtjes së tatimit në burim zbatohet vetëm kur pagesat u bëhen personave, të cilët nuk janë subjekt i tatimit mbi fitimin ose i tatimit të thjeshtuar mbi fitimin, si edhe kur pagesat u bëhen personave jorezidentë shqiptarë.

Gjithashtu ky mekanizëm zbatohet edhe ndaj jorezidentëve, për pagesa të tilla, të lindura nga një person me seli të përhershme që ai mban në Republikën e Shqipërisë.