Tatimi mbi të ardhurat personale aplikohet ndaj çdo të ardhure të çfardolloj forme, nga çdo burim, e realizuar nga çdo individ objekt tatimi në bazë të ligjit, me përjashtim të të ardhurave që shprehimisht përjashtohen nga ligji.

Individët rezidentë i nënshtrohen detyrimit për tatimin mbi të ardhurat personale gjatë periudhës tatimore për të gjitha burimet e të ardhurave (brenda dhe jashtë territorit të Republikës së Shqipërisë), ndërsa individët jorezidente i nënshtrohen detyrimit për tatimin mbi të ardhurat personale vetëm për të ardhurat me burim në Republikën e Shqipërisë.

 

3.1. Përcaktimi i të Ardhurave të Tatueshme

Për qëllime të tatimit mbi të ardhurat personale, merren si të ardhura të tatueshme këto kategori të ardhurash:

•  Pagat dhe shpërblimet e tjera, në lidhje me marrëdhëniet aktuale të punës;

•  të ardhurat që rrjedhin nga fitimi i ortakut apo i aksionerit në shoqërinë tregtare;

•  të ardhurat nga interesat bankare apo ato të përfituara nga investimi në letrat me vlerë.

•  të ardhurat që rrjedhin nga e drejta e autorit dhe pronësia intelektuale;

•  të ardhurat nga enfiteoza, huaja dhe qeratë, me përjashtim të rasteve, kur të ardhurat janë realizuar nga zhvillimi i një veprimtarie tregtare, në kuptim të legjislacionit tregtar;

•  të ardhurat nga kalimi i së drejtës së pronësisë mbi pasuritë e paluajtshme;

• të ardhurat e individëve nga lojërat e fatit dhe kazinotë;
• të ardhurat e realizuara nga diferenca ndërmjet çmimit të shitjes dhe çmimit të blerjes së kuotave ose aksioneve, që një ortak ose aksioner zotëron dhe ia shet një personi tjetër;
• të ardhura të tjera, që nuk identifikohen në format e paraqitura më sipër, të realizuara nga individë rezidentë ose nga persona jorezidentë, por me burim në Republikën e Shqipërisë.

 

3.1.1. Të ardhura personale të përjashtuara nga tatimi

Janë të përjashtuara nga tatimi mbi të ardhurat vetjake:

•  Të ardhurat e përfituara si rezultat i sigurimit në skemën e detyrueshme të sigurimeve shoqërore dhe shëndetësore, si dhe ndihmat ekonomike për individët pa të ardhura ose me të ardhura të ulëta, sipas përcaktimeve në legjislacionin përkatës në fuqi.

•  Bursat e nxënësve dhe të studentëve.

•  Shpërblimet e marra në raste sëmundjesh, fatkeqësish, në përputhje me dispozitat e legjislacionit përkatës në fuqi.

•  Të ardhurat e përfituara, përfshirë të ardhurat në formë monetare ose në natyrë, nga pronarët si shpërblim për shpronësimet që i bëhen nga shteti për interesa publikë.

•  Kontributet e detyrueshme të sigurimeve shoqërore dhe shëndetësore.

•  Të ardhurat që përjashtohen në bazë të marrëveshjeve ndërkombëtare të ratifikuara nga Kuvendi i Republikës së Shqipërisë.

 

3.2. Nivelet e Tarifave të Tatimit mbi të Ardhurat Personale

•  Pagat dhe shpërblimet, në lidhje me marrëdhëniet e aktuale të punës, do të tatohen sipas tarifave të përshkruara në tabelë.

E ARDHURA E TATUESHME (per Muaj)		TATIMI MBI TË ARDHUREN PERSONALE
Mbi (në Lekë)	Deri (në Lekë)	Lekë	Përqindje
0	14 000		Pragu përjashtues
14 000 +	30 000	0	+ 5 % të shumës mbi 14 000
30 000 +	60 000	800	+ 10 % të shumës mbi 30 000
60 000 +	80 000	3 800	+ 15 % të shumës mbi 60 000
80 000 +	100 000	6 800	+ 18 % të shumës mbi 80 000
100 000 +	125 000	10 400	+ 20 % të shumës mbi 100 000
125 000 +	150 000	15 400	+ 23 % të shumës mbi 125 000
150 000 +	Më tepër	21 150	+ 25 % të shumës mbi 150 000

•  Dividentët, të ardhurat që rrjedhin si fitim i ortakut, qoftë ky ortak i vetëm, interesat nga huatë, depozitat ose kontratat e ngjashme, të ardhurat nga e drejta e autorit ose pronësia intelektuale, qeratë apo të ardhura nga kontrata të tjera të ngjashme (huapërdorja, enfiteoza) dhe të ardhura të tjera tatohen 10 %.

•  Të ardhurat nga lojrat e fatit tatohen me 20%.

•  Të ardhurat e përfituara nga kalimi i së drejtës së pronësisë mbi pasuritë e paluajtshme tatohet sipas tabelës së mëposhtme.

ÇMIMI I SHITJES		TATIMI I PAGUESHËM
Mbi (Lekë)	Në (Lekë)	Përqindje
0	2 000 000	0,5 % e çmimit të shitjes
2 000 000 +	4 000 000	1 % e çmimit të shitjes
4 000 000 +	6 000 000	2 % e çmimit të shitjes
6 000 000 +	Më tepër	3 % e çmimit të shitjes

 

3.3. Pagesa e Tatimit mbi të Ardhurat Personale

Legjislacioni tatimor shqiptar parashikon mbajtjen në burim të tatimit mbi të ardhurat personale përgjithësisht për të gjitha llojet e të ardhurave. Pra personi që bën pagesën, është i detyruar të llogarisë, mbajë në burim dhe transferojë në buxhetin e shtetit, tatimin mbi të ardhurën personale që lidhet me pagesën e bërë nga ky person për një individ.

Lidhur me tatimin mbi të ardhurat personale nga pagat, çdo punëdhënës që paguan një pagë a shpërblim, është i detyruar të llogarisë dhe të mbajë në burim tatimin mbi të ardhurat personale (të ardhurat nga punësimi). Ky tatim i mbajtur nga punëdhënësi, duhet të derdhet në organin tatimor përkatës jo më vonë se data 25 e muajit pasardhës të kryerjes së pagesës.

Për pagesa të tjera që lidhen me të ardhurat e listuara në paragrafin “Përcaktimi i të ardhurave të tatueshme”, paguesi i të ardhurave mban në burim tatimin, sipas tarifave të përmendura me lart, dhe e derdh atë në organin tatimor përkatës jo më vonë se data 15 e muajit pasardhës të kryerjes së pagesës.

Për të ardhurat nga lojrat e fatit tatimi mbahet në burim dhe paguhet brenda 24 orëve nga kryerja e pagesës.

Pasuria e paluajtshme nuk regjistrohet në zyrën e regjistrimit të pasurive të paluajtshme, pa provuar pagimin e tatimit nga individi që kalon pasurinë.

Për të ardhura të realizuara nga burime jashtë Shqipërisë dhe/ose të paguara nga persona të cilët nuk mund të bëjnë mbajtjen e tatimit në burim për llogari të organeve tatimore Shqiptare, përfituesi i të ardhurave është i detyruar të deklarojë dhe të paguajë në organin tatimor përkatës tatimin në masën 10 % të të ardhurave të realizuara.

 

3.4. Detyrimi i Individëve për të Deklaruar dhe Paguar

Çdo individ që gjatë periudhës tatimore përfiton të ardhura, të cilat i nënshtrohen tatimit mbi të ardhurat personale, është i detyruar t'i deklarojë këto të ardhura si dhe tatimin përkatës të paguar për ato të ardhura çdo vit, sipas modelit të formularit “Deklarimi i të Ardhurave Personale nga Burime të Tjera” nuk i nënshtrohen detyrimit për paraqitjen e kësaj deklarate individët, të ardhurat e të cilëve janë taksuar në momentin e pagesës së këtyre të ardhurave, pra të ardhurat tatimi i të cilave mbahet në burim dhe transferohet në buxhetin e shtetit nga personi që bën pagesën.
 

Tatimet mbi Biznesin  |  TVSH - Tatimi mbi Vleren e Shtuar

 
 © ALBIC / IDRA.
Të gjitha të drejtat e rezervuara.
Informacioni ne faqet e www.ALBIC.net eshte falas me qellim informimin e vizitoreve te ketij portali, por ky informacion nuk mund te kopjohet, riprodhohet, publikohet, ne asnje lloj forme,
pa marre me pare autorizim nga ALBIC / IDRA.
Abuzuesit jane subjekt i penaliteteve sipas legjislacionit shqiptar dhe akteve nderkombetare.
info@albic.net