Baza e taksës së fjetjes në hotel është çmimi i fjetjes, sipas rastit, për dhomë ose për person, për një natë. Niveli i taksës nuk duhet të kalojë 5 për qind të çmimit të fjetjes.

Detyrimi për taksën llogaritet si shumëzim i nivelit të taksës me çmimin e fjetjes dhe numrin e netëve të qëndrimit në hotel.

Detyrimi për taksën i takon klientit që strehohet në hotel, detyrim i cili mbahet nga hoteli për llogari të bashkisë ose të komunës, në territorin e së cilës ndodhet hoteli.

 

7.2.5.2. Taksa e ndikimit në infrastrukturë nga ndërtimet e reja

Baza e taksës është vlera në lekë e investimit të ri, që kërkohet të kryhet. Klasifikimi si investim i ri dhe vlerat përkatëse përcaktohen në përputhje me legjislacionin në fuqi për dhënien e lejes së ndërtimit.

Niveli i taksës shprehet si përqindje e vlerës së investimit dhe është nga 1 deri në 3 % të kësaj vlere, ndërsa për Bashkinë e Tiranës është 2 deri 4 % të kësaj vlere investimi.

Detyrimi për pagimin e taksës i takon investitorit. E ardhura nga taksa, për çdo rast, mblidhet nga organi që lëshon lejen e ndërtimit dhe arkëtohet, për çdo rast, për llogari të bashkisë ose të komunës, ku përfshihet territori në të cilin do të bëhet investimi.

 

7.2.5.3. Taksa mbi kalimin e të drejtës së pronësisë për pasuritë e paluajtshme

Taksa mbi kalimin e të drejtës së pronësisë për pasuritë e paluajtshme vendoset për ndërtesat dhe të gjitha pasuritë e paluajtshme, në çastin e kalimit të së drejtës së pronësisë mbi to.

Taksa paguhet nga personi juridik që kalon të drejtën (shet, dhuron) e pronësisë mbi pasurinë e paluajtshme, para kryerjes së regjistrimit, në përputhje me aktet ligjore në fuqi. Pra kjo taksë paguhet nga personat juridike apo personat fizike tregtarë. Kjo taksë nuk paguhet nga individët që kalojnë (shesin, dhurojnë) pasuri të paluajtshme, pasi ata për këto transaksione paguajnë tatim mbi të ardhurat personale

Baza e taksës mbi kalimin e të drejtës së pronësisë për ndërtesat është sipërfaqja e ndërtimit, pronësia e së cilës transferohet. Niveli i taksës caktohet në lekë për metër katror të bazës së taksës. Detyrimi tatimor llogaritet si shumëzim i nivelit të taksës me bazën e tij.

Kategoritë e ndërtesave, për efekt të bazës së taksueshme dhe tarifat përkatëse jepen në tabelën e mëposhtme.  

Nivelet e taksës së kalimit të pronësisë mbi ndërtesat

	Bashkitë
	Zona 1	Zona 2	Zona 3
Kategoritë e ndërtesave	Tiranë Durrës	Vlorë , Fier , Sarandë , Pogradec , Korçë , Elbasan , Berat , Lushnjë , Gjirokastër , Shkodër , Kavajë , Lezhë	Të gjitha bashkitë e tjera
	Lekë / m2
I. Ndërtesa banimi	1 000	300	100
II. Ndërtesat e tjera për tregti dhe shërbime	2 000	700	300
II. Ndërtesa të tjera	1 500	500	200

Nivelet treguese të taksës, dhënë në tabelë, janë të vlefshme për bashkitë. Të gjitha komunat zbatojnë nivelin e taksës për zonën 3 të bashkive.

Për pasuritë e tjera të paluajtshme (tokë, truall) baza e taksës për kalimin e të drejtës së pronësisë është vlera e shitjes së tyre. Niveli i taksës caktohet në përqindje dhe niveli tregues i taksës është 2 %. Detyrimi tatimor llogaritet si shumëzim i nivelit të taksës me bazën e tij.

Vjelja e takses bëhet nga zyrat e regjistrimit të pasurive të paluajtshme ku regjistrohen këto pasuri.

Përjashtohen nga pagimi i taksës mbi kalimin e të drejtës së pronësisë për pasuritë e paluajtshme:

•  Enti Kombëtar i Banesave, Agjencia Kombëtare e Privatizimit dhe organet e qeverisjes qëndrore e vendore;

•  Personat, të cilët janë subjekt i tatimit mbi të ardhurat vetjake, në mbështetje të ligjit nr.8438, datë 28.12.1998 “Për tatimin mbi të ardhurat”;

•  Subjektet që dhurojnë pasuri të paluajtshme kur përfitues të drejtpërdrejtë janë:

•  Institucionet dhe entet shtetërore e publike, qëndrore e vendore;

•  Bashkësitë fetare ose organizatat jofitimprurëse, kur dhurimi lidhet me atë pjesë të veprimtarisë së tyre pa qëllim fitimi.

 

7.2.5.4. Taksa e regjistrimit të përvitshëm të mjeteve të transportit rrugor

Baza e taksës është lloji i mjetit të transportit rrugor.

Niveli i taksës shprehet në një kuotë të caktuar, sipas llojit të mjetit. Kategoritë dhe nivelet e caktuara sipas mjeteve përcaktohen në tabelën e mëposhtme. Detyrimi për taksën i takon pronarit të mjetit.

Nr.	Tipi i mjetit	Masa e taksës (në lekë)
1.	Motomjete	600
2.	Autoveturë me më pak ose e barabartë me ( 4 + 1) vende	2 400
3.	Autoveturë dhe mikrobus më pak ose e barabartë me (8+1) vende	4 800
4.	Autobus me më pak ose i barabartë me (32 + 1) vende	6 000
5.	Autobus me më pak ose i barabartë me (42 + 1) vende	7 200
6.	Autobus me më shumë se (42 + 1) vende	8 400
7.	Autobus artikular me më shumë se (42 + 1) vende	9 000
8.	Furgon dhe kamion me peshë maksimale të autorizuar deri në 3,5 tonë	3 600
9.	Kamion me peshë maksimale të autorizuar mbi 3,5 deri ose të barabartë me 7,5 tonë	4 800
10.	Kamion me peshë maksimale të autorizuar mbi 7,5 deri ose të barabartë me 18 tonë	6 000
11.	Kamion me peshë maksimale të autorizuar mbi 18 tonë	8 000
12.	Mjete për punime ndërtimi dhe toke (traktor rrugor, karkalec etj.) me peshë maksimale të autorizuar më të vogël ose të barabartë me 7.5 tone.	3 000
13.	Mjete për punime ndërtimi dhe toke (traktor rrugor, fadromë, autovinç etj.) me peshë maksimale të autorizuar mbi 7,5 tonë	3 600
14.	Rimorkio me peshë maksimale të autorizuar më të vogël ose të barabartë me 7 tonë	3 000
15.	Rimorkio me peshë maksimale të autorizuar mbi 7 tonë	4 000

 

Agjent për mbledhjen e kësaj takse jane strukturat e Drejtorisë së Përgjithshme të Shërbimeve të Transportit Rrugor. Kjo taksë derdhet për llogari të bashkisë ose të komunës.

Afati i fundit i regjistrimit të mjetit dhe i shlyerjes së detyrimit vjetor nga taksapaguesi është data 31 Mars. Pas kësaj date Policia e Qarkullimit Rrugor, kur konstaton se nuk është paguar kjo taksë, zbaton një gjobë të barabartë me taksën dhe nëse taksa dhe gjoba nuk paguhen brenda 10 ditëve, ajo bllokon mjetin deri në pagesën e taksës dhe të gjobës.

Përjashtohen nga pagimi i taksës për regjistrimin e përvitshëm mjetet në pronësi të trupave diplomatikë dhe të organizatave ndërkombëtare të akredituara në Republikën e Shqipërisë që gëzojnë statusin diplomatik, duke zbatuar parimin e reciprocitetit.

 

7.2.5.5. Taksa të tjera

•  Taksa për zënien e hapësirave publike;

•  Taksa e tabelës.

Për këto dy kategori të taksave vendore, Këshilli Bashkiak ose Këshilli Komunal vendosin bazën dhe nivelin e tyre.

 

7 .2.5.6. Taksa vendore të përkohshme

Këshilli Bashkiak ose Këshilli i Komunës kur e gjykojnë të domosdoshme, mund të vendosin taksa me karakter të përkohshëm dhe në interes të përgjithshem të banorëve të atij territori.